Men shaxsan 15 may kuni Putinni Istanbulda kutaman — Zelenskiy

Zelenskiy bu haqda oʻzining Telegram-kanalida yozib, "Payshanba kuni Turkiyada Putinni kutaman. Shaxsan. Umid qilamanki, bu safar rossiyaliklar yana bahona qidirmaydi", deya taʼkidlagan. 

Shuningdek, prezident bugun, 12 maydan boshlab toʻliq oʻt ochishni toʻxtatish kerakligini qayd etgan. "Qon toʻkilishini choʻzishning foydasi yoʻq", dedi u. Biroq, Kiyev ilgari talab qilganidek, Moskva kamida 30 kunlik sulh eʼlon qilishi kerakmi-yoʻqmi, bu borada Zelenskiy oʻzining soʻnggi bayonotida aniqlik kiritmadi. 

Bundan biroz oldin esa, AQSh prezidenti Donald Tramp Rossiya prezidentini 15 maydagi Istanbuldagi bevosita muzokaralarga zudlik bilan rozi boʻlishga chaqirdi. 

Trampning fikricha, bu uchrashuv davomida "bitim tuzish imkoniyati bormi-yoʻqmi" degan savolga javob olishi mumkin boʻladi. Agar imkon boʻlmasa, Yevropa va AQSh yetakchilari vaziyatning qaysi bosqichda ekanini aniq bilib, shunga mos ravishda harakat qiladi. 

Avvalroq Ukraina va uning Yevropadagi ittifoqchilari, jumladan Germaniya va Fransiya 30 kunlik sulhni muzokaralar uchun majburiy shart sifatida belgilab, Putinning oldindan shartlarsiz 15 may kuni Turkiyada toʻgʻridan-toʻgʻri muzokara oʻtkazish taklifiga shunday javob qaytargan edi.