Ukraina Rossiyaga qarshi urush uchun 20 mlrd dollar so‘ramoqchi

Hozirgi jang maydonidagi Rossiyadan ustunligini mustahkamlash uchun Ukraina ittifoqchilaridan qo‘shimcha 20 milliard dollar harbiy yordam so‘ramoqchi, degan xabar Ukraina mudofaa vazirligidan anonim tarzda sizdirildi.

Ushbu so‘rov 18-kuni “Ramshteyn guruhi” nomi bilan tanilgan Ukraina mudofaasi bo‘yicha Kiyevga moliyaviy va harbiy ko‘mak ko‘rsatuvchi 50 dan ortiq davlat ittifoqi guruhining yig‘ilishida o‘rtaga tashlanadi.

Ukrainaning o‘rta masofaga uchuvchi dronlari ta’minot va logistika zanjirlariga zarba bergani sababli, Rossiyaning bu yilgi yurishi sekinlashdi va o‘tgan oy to‘xtab qoldi deyarli. Ayni paytda, uzoq masofaga uchuvchi dron zarbalari Rossiya energetika sektoriga jiddiy zarar yetkazmoqda.

Ukrainaga pul kerak

So‘nggi haftalarda jang maydonidagi o‘zgarishlar Rossiyani muzokaralar stoliga Kiyev uchun ancha qulay shartlarda olib kelish imkonini berganini ta’kidladi ukrainalik harbiylar.

Ukraina dron kuchlari qo‘mondoni Robert Brovdining Reuters agentligiga aytishicha, uning strategik maqsadi – dron hujumlarini kuchaytirib, ta’minot yo‘llari va logistikasini izdan chiqarish orqali Rossiya qo‘shinlarini front chizig‘idan chekinishga majburlash.

Bunga erishish uchun esa Ukrainaga pul kerak.

“Ukrainadagi dronlarning ishlab chiqarish quvvati, sifati va ularni boshqaruvchi ekipajlar soni Rossiya iqtisodiyotiga halokatli zarbalar berish, logistikasini izdan chiqarish va shaxsiy tarkibini yo‘q qilish uchun yetarli”, — dedi Brovdi.

Rossiya oldinga siljiyapti - Putin

O‘tgan oy Zelenskiy Kiyevning strategik mavqeyi yaxshilanganidan foydalanib, Rossiya bilan tinchlik muzokaralarini qish kelmasidan oldin ilgari surish istagini bildirgan edi.

Biroq, Putinning aytishicha, Rossiya kuchlari har kuni oldinga siljimoqda va bunday muzokaralarga hojat yo‘q. Shuningdek, Ukraina zarbalari ziyon yetkazayotganini tan oldi Rossiya prezidenti.

Politico nashriga ko‘ra, kelasi haftadagi yig‘ilishda 20 milliard dollarlik maqsadga erishish uchun ayrim ittifoqchilardan yordam yoki qarz shaklida 2 milliarddan 6 milliard dollargacha hissa qo‘shish so‘raladi.