“Epshteyn orolidagi jirkanchliklar bari mujassam” – o‘zbek sayyohining Tailandga safari

Taniqli yozuvchi Muhammad Ismoil oʻzining Facebook sahifasida Tailandning mashhur kurort shahri — Pattayaga qilgan sayohati taassurotlari bilan bo‘lishdi.

Muallif yorqin reklamalar ortida yashiringan achchiq haqiqat, fahsh va ma’naviy inqiroz haqida jiddiy mulohaza yuritgan.

Turistik agentliklar taqdim etayotgan jozibador manzaralar va va’dalarga uchmaslikka chaqirgan sayyoh, Pattayadagi haqiqiy ahvolni dunyoni larzaga keltirgan jinoiy jinsiy ekspluatatsiya markazlariga qiyoslaydi.

Muallifning yozishicha, shaharda axloqsizlik, narkotik moddalar va jinsiy manipulyatsiyalar har qadamda uchraydi.

Shifoxonalarda $10 000 evaziga bir kunda jins o‘zgartirish amaliyotlari o‘tkazilishi, ko‘chalarda ochiqchasiga qoradorilar arzon narxda sotilishi, shuningdek, voyaga yetmagan qizlarning fohishalikka jalb etilgani sayyohni larzaga solgan.

"Islovotxonalar har qadamda 24 soat ishlaydi. Ko‘chada yurishingizga qo‘ymaydi. Nomiga massajxona, aslida esa maishatxona. Xizmat turlari narxi o‘ttiz mingdan ikki yuz ming so‘mgacha va undan yuqori. Hech qanday til bilishingiz shart emas, shunchaki boshingizni liqillatib rozilik bersangiz kifoya. Pul bo‘lsa, hamma muammo hal bo‘ladi", — deydi muallif.

"Faqat meva yedim va suv ichdim"

Mahalliy oshxona ham o‘zbekistonlik sayyohga ma’qul kelmagan. Ko‘chalarda hasharotlar, kaltakesak va turli qumursqalardan tayyorlangan taomlar sotilishi sababli, u sayohat davomida faqat meva-cheva va suv bilan kifoyalanganini aytadi.

Biroq, muallif shaharda ma’naviy tasalli topish mumkin bo‘lgan yagona joyni ham tilga olib o‘tgan:

"Yaxshiyam, Pattayada masjid bor ekan. Imomi tay millatiga mansub yaxshi odam ekan. U yerda jon saqladim. Baxt osmono‘par binolarda yashashda emas, insoniy yuksaklikda yashashdadir".

Axloqsizlikka taslim bo‘lgan yurt

Maqolada Tailand xalqining o‘tmishiga ham to‘xtalib o‘tilgan. Tailand — tarixan g‘arb davlatlari tomonidan hech qachon mustamlaka qilinmagan, o‘z mustaqilligini mardlik va jasorat bilan himoya qilib kelgan qadimiy o‘lka.

Biroq, muallifning achinish bilan qayd etishicha, g‘olib xalq bugungi kunda "demokratiya va erkinlik" bayrog‘i ostida kirib kelgan ma’naviyatsizlikka, hayvoniy hislarga va axloqsizlikka taslim bo‘lgan.

Muhammad Ismoil o‘z postini vatandoshlariga murojaat bilan yakunlagan. Unga ko‘ra, o‘z irodasiga to‘liq ishonmaganlar bu shaharga aslo bormasligi kerak.

Shu kabi joylarga yaqinlarni, farzandlarni yuborish ma’naviy xavf tug‘diradi. Eng muhimi, turizm niqobi ostida kirib kelishi mumkin bo‘lgan bunday salbiy illatlardan o‘z mamlakatimizni asrashimiz zarurligi ta’kidlangan.

"O‘zbek o‘zbekni asrashi, himoya qilishi kerak. Shu dunyoqarash ko‘nglimda bo‘lgani uchun bu fikrlarni yozishga qaror qildim", — deya xulosa qiladi muallif.