Mahalla raislari 5 ming kv m gacha davlat mulklarini auksionga chiqarishi mumkin boʻladi

Bu haqda prezident Shavkat Mirziyoyev raisligida mahalla tizimini yanada takomillashtirish va joylarda ishlarni samarali tashkil etish masalalari yuzasidan videoselektor yigʻilishida maʼlum qilindi. 

Davlat rahbari matbuot kotibi Sherzod Asadovning yozishicha, bunga qadar mahallalarga 2 ming kvadrat metrgacha boʻsh davlat obʼektlarini auksionga chiqarish vakolati berilgan. Masalan, Samarqand shahar Shodlik mahallasi 1,5 ming kvadratli bino sotuvidan mahalla byudjetiga 5 milliard soʻm tushirgan.

“Koʻryapsizlarmi, qolgan mahallalarda ham “yettilik” izlansa, 3 mingga yaqin bunday binolarni sotish orqali ancha masalani hal qilsa boʻladi”,  – dedi Prezident. 

Mahallalarga mablagʻ ajratilib, sharoit yaratilgani uchun shu yilning oʻzida 237 ming oila kambagʻallikdan chiqqan. Biroq yimgʻilishda 28 ta kichik tumanda ishsizlikka qarshi yetarli chora koʻrilmayotgani qayd etildi.

Mahalla tizimi uchun masʼul rahbarlarga bugundanoq ishchi guruhi tuzish va ushbu 28 ta tumanga borib, ulardagi ishsizlik, kambagʻallik va jinoyatchilikni kelasi yili 2 karra qisqartirish boʻyicha chora-tadbirlarni ishlab chiqish topshirildi.