Mirziyoyev Rossiyadan Toshkentga qaytdi. Ikki kunlik tashrifdan nimalar maʼlum?

Joriy yilning 7 oktabr kuni Shavkat Mirziyoyev mingan samolyot Moskvaning "Vnukovo" aeroportiga borib qoʻndi. Davlat rahbarini aeroportda Rossiya Prezidenti Vladimir Putinning yordamchisi Maksim Oreshkin va boshqa rasmiy shaxslar kutib oldi. Prezident matbuot xizmati ochiqlagan maʼlumotlarga koʻra, tashrifning birinchi kuni shunday yakunlangan. Ertasi kuni, yaʼni 8 oktabrda Mirziyoyev MDH davlat rahbarlari kengashining navbatdagi majlisida ishtirok etgan.

Tadbir Rossiya Prezidenti Vladimir Putin raisligida boʻlib oʻtgan. Sammitda Ozarbayjon Respublikasi Prezidenti Ilhom Aliyev, Belarus Respublikasi Prezidenti Aleksandr Lukashenko, Qozogʻiston Respublikasi Prezidenti Qasim-Jomart Toqayev,, Qirgʻiz Respublikasi Prezidenti Sadir Japarov, Tojikiston Respublikasi Prezidenti Emomali Rahmon, Turkmaniston Prezidenti Serdar Berdimuhamedov va Armaniston Bosh vaziri Nikol Pashinyan, shuningdek, MDH bosh kotibi Sergey Lebedev ishtirok etgan. 

Mirziyoyev sammitda nutq soʻzlab, nutqida Rossiyaning MDH raisligi davrida koʻp tomonlama hamkorlikning barcha yoʻnalishlarida rivojlanganini yuqori baholab, mamlakatlarining xavfsizligi va barqaror rivojlanishini taʼminlash bilan bogʻliq vaziyatga alohida eʼtibor qaratishi kerakligini taʼkidlagan. Shuningdek, Prezident MDH mamlakatlari maxsus xizmatlari va vakolatli idoralarining tizimli hamkorligini yoʻlga qoʻyish, bugungi tahdidlarga qarshi kurashish usullarini takomillashtirish, kiberxavfsizlikni taʼminlash sohasida kelishilgan choralar hamda dasturiy hujjatlarni qabul qilish muhimligiga eʼtibor qaratish kerakligini bildirgan. 

Sammitda Oʻzbekistonning MDH mamlakatlari bilan tovar ayirboshlash hajmi yil boshidan buyon 16 foizga oshgani ham tilga olingan hamda 2025 yil bahorida Toshkent shahrida "Innoprom" xalqaro sanoat koʻrgazmasi doirasida MDH Iqtisodiy kengashi yigʻilishi va Innovatsion rivojlanish forumini oʻtkazish taklif etilgan. Shuningdek, MDH mamlakatlari yetakchi tahliliy markazlarining Toshkent konferensiyasi boʻlib oʻtganida internet texnologiyalari va "katta maʼlumotlar" industriyasini rivojlantirish, raqamli yechimlarni joriy etish, kreativ iqtisodiyot, yashil energetika va yadro texnologiyalari, iqlim muammolarni oʻrganish muhokama qilingani ham tadir davomida keltirib oʻtilgan. 

Bundan tashqari, sammit qatnashuvchilari tomonidan Samarqand shahrida sunʼiy intellektni rivojlantirish masalalariga bagʻishlangan MDH mamlakatlari ekspertlari va tahlilchilarining uchrashuvlarini oʻtkazish taklif etilgan. Gumanitar almashinuvlarni kengaytirish maqsadida Hamdoʻstlik davlatlari madaniyati kunlarini oʻtkazish kerakligi ham bildirilgan. Shu bilan birga, sogʻliqni saqlash, taʼlim, sanʼat, kino, turizm va sport sohalarida qoʻshma tadbirlar dasturini har yili tayyorlash zarurligi bildirilgan. 

Sammitda Oʻzbekistonda shaxmat va futbol boʻyicha yoshlar jamoalari oʻrtasida MDH ochiq kubogi musobaqalari oʻtkazilishi rejalashtirilayotgani maʼlum qilingan. Tadbir yakunida esa Oʻzbekiston Prezidenti Tojikiston Respublikasi Prezidenti Emomali Rahmonni 2025 yilda tashkilotga raislikni qabul qilgani bilan tabriklagan. Hamda MDH doirasidagi hamkorlikning ustuvor yoʻnalishlari boʻyicha bir qator bitim va qarorlar qabul qilingan. Biroq mazkur qarorlar nimalarni tashkil etilishi hanuz ochiqlanmadi. 

Shu bilan Oʻzbekiston rahbarining Moskva shahriga qilgan tashrifi yakunlandi. Davlat rahbari Toshkentga keldi. Uni "Vnukovo" xalqaro aeroportigacha Rossiya Federatsiyasi sanoat va savdo vaziri Anton Alixanov hamda boshqa rasmiy shaxslar kuzatib qoʻygan.