Namanganda 8 yoshli bola yuk mashinasi urishi oqibatida halok boʻldi

Dasturga koʻra, YTH viloyatning Uychi tumani "Objuvoz" mahallasida soat 12:30 lar atrofida yuz bergan. Mazkur mahallaning Diyor koʻchasi boʻylab GAZ-53 rusumli yuk mashinasida harakatlanib kelayotgan haydovchi oʻzidan oldinda harakatlanayotgan 8 yoshli velosipedchini payqamay qolishi oqibatida uni urib yuborgan. 

Buning oqibatida bola bosh miya yopiq shikastlanishi tashxisi bilan shifoxonaga yotqizilgan. Biroq unga koʻrsatilgan tibbiy yordamga qaramasdan shifoxonada vafot etgan.  

"Yosh bola yoʻl chetida velosiped haydab ketayotganini koʻrdim. Ammo u birdan katta yoʻlga chiqib kelishini oʻylamagandim. Tormoz berishga ulgurmadim. Barchadan yoʻl harakati qoidalariga amal qilishni soʻrab qolardim",  deydi haydovchi.

"Gazeta.uz" nashriga koʻra, yuqoridagi holat yuzasidan haydovchiga nisbatan Jinoyat kodeksining 266-moddasi 2-qismi (Odam oʻlimiga sabab boʻlgan Transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qoʻzgʻatilgan. Hozirda tergov harakatlari davom etmoqda.  

Eslatib oʻtamiz, joriy yilning 5 oktabr kuni Samarqand viloyati Narpay tumanida ham "Damas" mashinasi yoʻlda harakatlanib ketayotganda yoʻlning belgilanmagan joyidan yugurib chiqqan ayolni urib yuborgandi. Oqibatda ogʻir tan jarohatlari olgan ayol tuman shifoxonasida vafot etgan edi.