Shavkat Mirziyoyev “Fishvel Norin” korxonasi faoliyati bilan tanishdi

“Fishvel Norin” korxonasi 3 million dollar hisobiga loyiha boshlagan. Ikki gektardan ziyod hududda 76 ta innovatsion havza tashkil etilgan. Hozirgi kunda shundan 40 tasi ishga tushirilgan boʻlib, super intensiv usulda gulmohi baligʻi yetishtirilmoqda. Umuman, bu yerda yiliga 2 ming tonna tansiq goʻsht yetishtirib, 5 million dollarlik eksport qilish moʻljallangan.

Muhim tomoni, korxona mahalliy aholini baliq yetishtirishga oʻrgatyapti. Xoʻjaqoʻrgʻoncha mahallasidagi 25 ta xonadon klaster bilan kooperatsiya qilib, har biri yiliga 150 million soʻmgacha daromad koʻryapti.

Buni yanada kengaytirib, Norin va Uchqoʻrgʻon tumanlaridagi 100 ta oilani baliqchilikka jalb etish rejalashtirilgan. Jumladan, 2 ming tonna gulmohidan 500 tonnasi xonadonlarda yetishtiriladi. Natijada 300 dan ziyod kishi ish bilan taʼminlanadi. 

Baliqchilik rivojlangani yana bir yoʻnalishni vujudga keltirdi – korxona yonida zamonaviy restoran ham barpo etildi. Unda baliqdan turli xil taomlar tayyorlanib, mehmonlarga taklif qilinadi. Bu turizm va boshqa xizmatlar kengayishiga ham hissa qoʻshyapti.

Prezident mutasaddilarga respublika boʻyicha gulmohi yetishtirish mumkin boʻlgan tumanlarni aniqlab, mazkur tizimni ommalashtirish boʻyicha koʻrsatmalar berdi. Niderlandiyalik hamkorlar bilan baliq ozuqasi ishlab chiqarish, Norindagi tik quduqlar yonida sunʼiy hovuzlar oʻrnatib, aholiga boʻlib berish boʻyicha vazifalar belgilandi.

Ayni paytda Namangan viloyatida meliorativ quduqlar atrofida davlat-xususiy sheriklik asosida yana 34 ta intensiv basseyn barpo etilgan. Yana bir jihat shundaki, baliq boqilgan suv minerallarga boyishi evaziga qishloq xoʻjaligi mahsulotlari yetishtirishda ishlatilmoqda. Bunda xorijlik mutaxassislar tajribasiga tayanilmoqda.

Shu yerda davlat rahbariga “Islohotlar shtabi” faoliyati yuzasidan axborot berildi. Qayd etilganidek, tadbirkorlar bilan birgalikda 1 milliard dollarlik loyihalar amalga oshirilmoqda. Ularning natijasida jami 12 ming ish oʻrni, byudjetga qoʻshimcha 200 milliard soʻm tushum, 160 million dollar eksport manbai paydo boʻladi.

Jumladan, shunday manzilli ishlar orqali Mingbuloq va Norin tumanlari iqtisodiyotini yaxshilash koʻzda tutilgan. Aholiga tayyor loyihalar berib hamda kasbga yoʻnaltirib, bandligini taʼminlash choralari belgilangan.

Prezident Norin tumanidagi “Rasulov Gʻofurjon oʻgʻli Bahodir” fermer xoʻjaligi dalasida ham boʻlib, paxta terimini koʻzdan kechirdi. Bu yerda xorijiy goʻza navi ekilib, yuqori hosil yetishtirilgan. Kimyoviy ishlov berishga uchuvchisiz apparatlar, terimga zamonaviy mashinalar jalb etilgan. Ular yordamida paxta nest-nobud qilinmay, toza terib olinyapti.