Ozarbayjonning “Socar” kompaniyasi Oʻzbekiston energetika bozoriga kiradigan boʻldi

Prezident Shavkat Mirziyoyev 21 iyul kuni neft-gaz sohasida xorijiy hamkorlar bilan amalga oshirilayotgan ishlar hamda kuz-qish mavsumiga tayyorgarlik chora-tadbirlariga oid taqdimot bilan tanishdi.

Taʼkidlanishicha, Ozarbayjonning “Socar” kompaniyasi bilan Ustyurtdagi konlarda qidiruv oʻtkazib, neft qazib olish boʻyicha kelishuvga erishilgan. Birgalikda istiqbolli maydonlarda geologiya-qidiruv ishlarini olib borish rejalashtirilgan.

Shuningdek, boshqa xorijiy davlatlar bilan murakkab konlarni oʻzlashtirish, sohani raqamlashtirish, talab yuqori boʻlgan mutaxassislarni tayyorlash kabi muhim yoʻnalishlarda hamkorlik qilinmoqda.

Taqdimotda mutasaddilar sheriklikdagi ishlarning borishi va galdagi rejalar yuzasidan axborot berdi.

Prezident istiqbolli maydonlar boʻyicha aniq loyihalarni shakllantirish, geologiya-qidiruv ishlaridan tayyor mahsulot olishgacha boʻlgan toʻliq zanjirni yoʻlga qoʻyish yuzasidan koʻrsatmalar berdi.

Shu bilan birga, amaldagi xorijiy va qoʻshma korxonalarda yangi burgʻulash usullarini qoʻllash, quduqlarning samaradorligini oshirish orqali neft va gaz hajmini koʻpaytirish zarurligi taʼkidlandi.

Yigʻilishda kuz-qish mavsumiga tayyorgarlik masalalari ham koʻrib chiqildi. Mutasaddilar buning uchun yetarli energiya ishlab chiqarish, gaz omborlarida jamgʻarish va muvozanatli yetkazib berish choralari koʻrilayotgani toʻgʻrisida axborot berdi.

Xususan, Tallimarjon issiqlik elektr stansiyasida 1 ming 65 megavattli ikkita bugʻ-gaz qurilmasi, Sirdaryoda 1 ming 573 megavattli issiqlik elektr stansiyasi barpo etilmoqda. Ularning jami quvvati yiliga 20 milliard kilovatt-soat boʻladi.

Shuningdek, bu yil Toshkent, Namangan, Qashqadaryo va Surxondaryo viloyatlarida jami 162 megavattli yangi gidro elektr stansiyalar ishga tushiriladi. Ularda yiliga 648 million kilovatt-soat elektr ishlab chiqariladi. Bular, avvalo, xalqimiz ehtiyoji va oʻsib borayotgan iqtisodiyot uchun qoʻshimcha quvvat boʻladi.

Ayni paytda tegishli tarmoq va podstansiyalarni taʼmirlash ishlari ham boshlangan. Issiqlik stansiyalari barqaror ishlashi uchun zarur yoqilgʻi, butlovchi va ehtiyot qismlar zaxiralari shakllantirilmoqda.

Yigʻilishda soha infratuzilmasini izchil modernizatsiya qilib, energiya yetkazib berish uzluksizligini taʼminlash boʻyicha vazifalar belgilandi.