Oʻzbekiston Osakadagi butunjahon koʻrgazmasida oltin medalni qoʻlga kiritdi

Bu mukofot Xalqaro koʻrgazmalar byurosi (BIE) tomonidan taqdim etiladi va koʻrgazmaning asosiy mavzusini eng ilgʻor, kreativ hamda samarali shaklda namoyon etgan pavilonlarga beriladi.

Oʻzbekiston paviloni “Bilimlar bogʻi: kelajak jamiyati uchun laboratoriya” konsepsiyasi asosida ishlab chiqilgan boʻlib, u milliy anʼanalar bilan zamonaviy innovatsiyalarni uygʻunlashtirgan.

Oʻzbekiston prezidenti administratsiyasi rahbari Saida Mirziyoyeva bu haqda shunday dedi:

“Gʻoyamiz jahon hamjamiyatida keng aks-sado berdi. Barchani ruhlantirgan professionallik va loyihaga boʻlgan ishonch uchun butun jamoamizga hamda xalqaro hamkorlarimizga samimiy minnatdorlik bildiraman”.

EKSPO-2025ning asosiy mavzusi — “Hayotimiz uchun kelajak jamiyatini yaratish” boʻlib, Oʻzbekiston pavilonidagi “Bilimlar bogʻi” gʻoyasi ushbu mavzuga hamohang ravishda ishlangan. Loyiha bilim, fan va innovatsiyalar orqali kelajakni barpo etish gʻoyasini ilgari suradi.

BIE mukofoti 1928 yildan buyon butunjahon koʻrgazmalarining eng nufuzli sovrinlaridan biri hisoblanadi. U innovatsion yondashuvlar, ilgʻor texnologiyalar va madaniy xususiyatlarni muvaffaqiyatli uygʻunlashtirgan ishtirokchilarni ragʻbatlantiradi.

Taʼkidlash joizki, Oʻzbekiston 1993 yildan beri EKSPO koʻrgazmalarida ishtirok etib kelmoqda va bu yil ilk bor oliy — BIE oltin mukofotini qoʻlga kiritdi.