Ўзбекистон Осакадаги бутунжаҳон кўргазмасида олтин медални қўлга киритди

Бу мукофот Халқаро кўргазмалар бюроси (BIE) томонидан тақдим этилади ва кўргазманинг асосий мавзусини энг илғор, креатив ҳамда самарали шаклда намоён этган павилонларга берилади.

Ўзбекистон павилони “Билимлар боғи: келажак жамияти учун лаборатория” концепцияси асосида ишлаб чиқилган бўлиб, у миллий анъаналар билан замонавий инновацияларни уйғунлаштирган.

Ўзбекистон президенти администрацияси раҳбари Саида Мирзиёева бу ҳақда шундай деди:

“Ғоямиз жаҳон ҳамжамиятида кенг акс-садо берди. Барчани руҳлантирган профессионаллик ва лойиҳага бўлган ишонч учун бутун жамоамизга ҳамда халқаро ҳамкорларимизга самимий миннатдорлик билдираман”.

ЭКСПО-2025нинг асосий мавзуси — “Ҳаётимиз учун келажак жамиятини яратиш” бўлиб, Ўзбекистон павилонидаги “Билимлар боғи” ғояси ушбу мавзуга ҳамоҳанг равишда ишланган. Лойиҳа билим, фан ва инновациялар орқали келажакни барпо этиш ғоясини илгари суради.

BIE мукофоти 1928 йилдан буён бутунжаҳон кўргазмаларининг энг нуфузли совринларидан бири ҳисобланади. У инновацион ёндашувлар, илғор технологиялар ва маданий хусусиятларни муваффақиятли уйғунлаштирган иштирокчиларни рағбатлантиради.

Таъкидлаш жоизки, Ўзбекистон 1993 йилдан бери ЭКСПО кўргазмаларида иштирок этиб келмоқда ва бу йил илк бор олий — BIE олтин мукофотини қўлга киритди.