Oʻzbekiston va Gruziya oʻrtasida aviaqatnovlar soni koʻpaytiriladi

Oʻzbekiston Transport vaziri Ilhom Mahkamov Gruziya iqtisodiyot va barqaror rivojlanish vaziri Mariam Kvrivishvili xonim bilan muzokaralar oʻtkazdi.

Tomonlar avtomobil va temir yoʻl tashuvlari sohasida ikki tomonlama hamkorlikni kengaytirish, shuningdek, Gruziya dengiz portlaridan foydalangan holda xalqaro multimodal transport yoʻlaklarini rivojlantirish bilan bogʻliq masalalarni muhokama etishdi.

Shuningdek, I.Mahkamov "Xitoy – Qirgʻiziston – Oʻzbekiston" temir yoʻli qurilishi loyihasining ahamiyati va kelgusida mazkur temir yoʻlning xalqaro transport yoʻlaklari tizimiga, jumladan, Oʻrta yoʻlakka integratsiyalashuvini inobatga olib, gruzin tomoniga ushbu loyihada ishtirok etish imkoniyatini koʻrib chiqishni taklif etdi.

Ikki mamlakatning sayyohlik salohiyatini rivojlantirish maqsadida vazirlar Oʻzbekiston va Gruziyaning sayyohlik shaharlari oʻrtasidagi aviaqatnovlar sonini koʻpaytirish yuzasidan fikr almashdi.