Gruziyada oʻn minglab odamlar namoyishga chiqdi: Kim, qachon, qayerda? (fotoreportaj)

Bu qaror Gruziyaning Yevropa Ittifoqiga yaqinlashish orzusiga qattiq toʻsqinlik sifatida qabul qilindi va keng jamoatchilikning noroziligiga sabab boʻldi. Hatto Prezident Salome Zurabishvili ham namoyishchilarga qoʻshilib, hukumatni tanqid qildi va qarorni bekor qilishni talab qildi. 

Bir necha kundan buyon davom etib kelayotgan norozilik namoyishida 100 mingga yaqin aholi parlament binosining oldida qoʻllariga bayroq koʻtarib, Gruziyaning Yevropa Ittifoqiga kirishini talab qilmoqda. Bunga javoban politsiyachilar suv purkagichlar, koʻzdan yosh oqizuvchi gaz va rezina oʻqlardan foydalanib, qarshilik koʻrsatmoqda.

 Toʻrt kun ichida 224 nafar fuqaro qoʻlga olinib, shundan 36 nafari jarimaga tortilgan, 34 nafar fuqaroga maʼmuriy qamoq chorasi qoʻllanilgan. Yana ikki nafar shaxsga esa jinoiy ish qoʻzgʻatilgan. 

Namoyishga chiqqanlar politsiyani rus qullari deya atab, ularga qarata pirotexnika vositalari hamda tosh uloqtirmoqda. Buning oqibatida hozirgacha 113 nafar politsiyachi jarohatlandi. 

Tbilisidan tashqari yana sakkizta shaharda namoyishlar kuzatilmoqda. Namoyishchilar Qora dengizda joylashgan mamlakatning asosiy savdo portiga kirish yoʻlini ham toʻsib qoʻygan. 

Bu holat ortidan Gruziyaning Italiya, Niderlandiya va Litvadagi elchilari, shuningdek, Tashqi ishlar vaziri oʻrinbosari isteʼfoga chiqdi. AQSh Davlat departamenti Gruziya bilan strategik munosabatlarni tugatdi. Yevropa Ittifoqi ham Gruziyada avtoritarizm kuchlayotganini va politsiya namoyishchilarga qarata agressiv munosabatda boʻlayotganini tanqid qilmoqda.

CNN talqiniga koʻra, "Gruziya orzusi" partiyasi rusparast boʻlib, unga Rossiyada boylik orttirgan milliarder tomonidan asos solingan.

"2008 yilda Rossiya va Gruziya oʻrtasida besh kunlik urushdan keyin ikki mamlakatning munosabatlari butkul uzilgan edi. Biroq, soʻngi yillarda Tiblisi va Moskva oʻrtasidagi munosabatlar iliqlashgan. Bunga esa qisman "Gruziya orzusi" partiyasi Rossiyaga Yevropa davlatlariga taʼsir qilishda yordam bergani sabab boʻlgan", deyiladi CNN nashrida yoritilgan maqolada.

Mamlakat Bosh vaziri Irakliy Kobaxidze "Gruziya orzusi" partiyasining Rossiya bilan aloqadorligi haqidagi gaplarni rad etdi. Buning ortidan kecha, 2 dekabr kuni Kreml matbuot kotibi Dimitry Peskov ham Rossiya Gruziyadagi siyosiy jarayonlarga aralashmayotgani haqidagi bayonot bilan chiqdi. 

Kobxaidzening aytishicha, partiya Gruziyaning Yevropa Ittifoqiga kirish masalasida sodiq qoladi. Shunga qaramay, Gʻarb partiyaning maqsadlariga shubha bilan qaramoqda. Unga koʻra, aslida Yevropa Ittifoqi muzokaralarini kechiktirishni noqonuniy deb atagan yuzlab gruziyalik diplomatlar va davlat xizmatchilariga shubha bilan qarash kerak. 

Bundan xulosa qilish mumkinki, ushbu noroziliklar Gruziyaning Yevropaga yaqinlashish istagining qancha chuqur ekanligini bildiradi. Shuningdek, hukumatning xalq talablari bilan hisoblashmasligi qanday oqibatlarga olib kelishini yaqqol koʻrsatib bermoqda. 

Shohjahon Majidov