Toshkentda Xalqaro migratsiya forumi boshlandi: 40 dan ortiq davlatdan 600 vakil ishtirok etmoqda

Bugun O‘zbekiston poytaxtida “Ijtimoiy-huquqiy muhofaza qilish va mehnat migrantlari hamda ularning oila a’zolari” mavzusiga bag‘ishlangan birinchi Toshkent xalqaro migratsiya forumi o‘z ishini boshladi.

Ushbu forum O‘zbekiston Vazirlar Mahkamasi huzuridagi Migratsiya agentligi hamda Xalqaro migratsiya tashkiloti bilan hamkorlikda tashkil etildi.

Tadbirda Markaziy Osiyo, Osiyo, Yevropa va AQSHning 40 dan ortiq mamlakatidan 600 nafardan ziyod vakillar ishtirok etmoqda.

Tadbir doirasida quyidagi masalalar muhokama qilinishi rejalashtirilgan:

-      legal migratsiya yo‘llarini kengaytirish;

-      mehnat migrantlarining huquqlari va farovonligini ta’minlash;

-      migratsiya sohasida xalqaro hamkorlikni mustahkamlash.

Ayniqsa, iqlim o‘zgarishining aholi mobilligiga ta’siri hamda barqaror rivojlanish masalalariga alohida e’tibor qaratilmoqda.

Xalqaro migratsiya tashkiloti ma’lumotlariga ko‘ra, dunyoda taxminan 304 million xalqaro migrant mavjud bo‘lib, ulardan 168 millioni mehnat migrantlaridir.

Migrantlarning o‘z oilalariga yuboradigan yillik pul o‘tkazmalari hajmi taxminan 905 milliard AQSH dollarini tashkil etadi.

Forum yakunlari bo‘yicha xalqaro ish beruvchilar va O‘zbekiston Migratsiya agentligi o‘rtasida yangi kelishuvlar imzolanishi kutilmoqda.

Shuningdek, forum doirasida xalqaro til va kasbiy tayyorgarlik markazi “INTIL”ning ochilish marosimi bo‘lib o‘tadi.

Ushbu markaz O‘zbekiston fuqarolarini zamonaviy kasblar va xorijiy tillarga o‘qitish, ularni keyinchalik xorijda ishga joylashtirishga ixtisoslashgan.