Mehmonxonadagi yongʻin "Milliy bank" binosiga ham oʻtdimi? FVB yongʻinga doir maʼlumotlarni ochiqladi

Qayd etilishicha, yongʻin yuzaga kelgan "Miran International" mehmonxonasi Toshkent shahrining Mirobod tumanida joylashgan boʻlib, binoda qurilish ishlari davom etayotgan boʻlgan. Toshkent shahar Favqulodda vaziyatlar boshqarmasining axborot xizmatiga koʻra, mehmonxonadagi yongʻin binoning tom qismida yuzaga kelgan. 

"Bugun, 16 oktabr kuni soat 17:17 da Toshkent shahar Mirobod tumani Shahrisabz koʻchasida qurilish ishlari olib borilayotgan binoda yongʻin sodir boʻlayotgani toʻgʻrisida Toshkent shahar FVBga xabar kelib tushgan. Shunga koʻra, yongʻin-qutqaruv ekipaji soat 17:24  da voqea joyiga yetib borib, hozirda yongʻinni oʻchirish ishlari amalga oshirilmoqda", deyiladi FVBning dastlabki xabarida.

Shuningdek, boshqarma maʼlumotida voqea joyiga Toshkent shahar FVB va Favqulodda vaziyatlar vazirligi rahbariyatidan masʼullar chiqqani ham maʼlum qilingan. 

"Yongʻinni bartaraf etish jarayonini Favqulodda vaziyatlar vaziri general-mayor A.X.Qoʻldoshev bevosita joyidan boshqarib bormoqda", deya qoʻshimcha qilingan xabarda.

Bundan tashqari, voqea joyiga Toshkent shahar hokimi Shavkat Umurzakov hamda Ichki ishlar boshqarmalari, Milliy gvardiya va prokuratura rahbariyati ham kelgan. 

"Favqulodda vaziyatlar vaziri general-mayor Abdulla Qoʻldoshev, Toshkent shahar hokimi Shavkat Umurzakov hamda Toshkent shahar Favqulodda vaziyatlar, Ichki ishlar boshqarmalari, Milliy gvardiya va prokuratura rahbariyati voqea joyiga darhol yetib kelishdi va yongʻinni bartaraf etish jarayonini toʻliq nazoratga oldilar", deyiladi hokimlik xabarida.

Soʻng FVV yongʻinni oʻchirishda jami 14 nafar ekipaj ishtirok etganini hamda bino hududi soat 18:19 da oʻrab olinganini hamda yongʻin 19:16 da oʻchirilganini, yongʻin oqibatida tan jarohati olgan va vafot etgan fuqarolar yoʻqligini bildirdi. 

"Miran International" mehmonxonasining tom qismida yuz bergan yongʻinni bartaraf etish maqsadida 14 ta yongʻin-qutqaruv ekipaji voqea joyiga soat 17:24 da yetib borib, yongʻin soat 18:19 da qurshab olingan va soat 19:16 da bartaraf etildi. Yongʻin oqibatida tan jarohati olgan va vafot etgan fuqarolar toʻgʻrisida xabar kelib tushmadi", deyiladi FVBning yakuniy izohida.

Yongʻin boʻyicha yuqorida keltirilgan maʼlumotlarga koʻra, ushbu holat faqat "Miran International" mehmonxonasining tom qismida yuzaga kelgan. Mehmonxonaga yaqin boʻlgan "Milliy bank"  binosiga yongʻin oʻtmagan. 

Maʼlumot uchun, bundan ikki yil oldin, yaʼni 2022 yilda "Accor" xalqaro mehmonxonalar guruhi Oʻzbekistonda uchta yangi premium mehmonxona ochishni rejalashtirayotganini eʼlon qilgan edi. Ulardan biri "Swissô Tashkent" brendi ostida "Miran International" mehmonxonasi bazasida rekonstruksiya qilinganidan keyin ochilishi bildirilgan. Binoni taʼmirlash ishlari 2023 yilning uchinchi choragida yakunlanib, ishga tushirilishi rejalashtirilgan edi. Biroq hanuz binoda rekonstruksiya ishlari davom etmoqda.  

Eslatib oʻtamiz, joriy yilning 1 oktabrida Toshkent davlat agrar universiteti binosi ham yonib ketgandi. Lekin mazkur binodagi yongʻinni joyidan turib nazorat qilishda na viloyat hokimi, na Favqulodda vaziyatlar vaziri general-mayor Abdulla Qoʻldoshev borgan edi.