Navoiyda fuqarolarni Ukrainaga qarshi urushga yollash orqali pul ishlamoqchi boʻlgan shaxs ozodlikdan mahrum qilindi

Navoiyda fuqarolarni Ukrainaga qarshi urushda Rossiya tomonidan ishtirok etishga yollash orqali pul ishlamoqchi boʻlgan ayol jinoiy jazoga tortildi. Kun.uz sud hujjati bilan tanishdi.

Sud hukmida keltirilishicha, 1981 yilda tugʻilgan N.U. Navoiy shahrida yashab kelgan. U muqaddam firibgarlik jinoyati bilan sudlangan.

N.U. 2024 yil oktabr oyida jinoyat ishining unga oid qismi alohida ish yurituviga olingan shaxs taklifiga asosan Samara shahriga borgan. Ushbu shaxs va ayol Oʻzbekiston fuqarolarini Ukrainaga qarshi urushga jalb qilib, moddiy manfaatdor boʻlish haqida jinoiy reja tuzishgan.

Shundan soʻng ayol 2025 yil yanvar oyida yashash manziliga qaytib kelgan. U oyiga 4 ming dollardan 7 ming dollargacha pul berilishini, yil davomida 40 ming dollar ishlab olishini aytib, fuqaro A.P.ni Ukrainaga qarshi urushda ishtirok etishga yollagan. Ayol fuqaroning chet elga chiqish pasporti maʼlumotlarini WhatsApp orqali Rossiyadagi sherigiga joʻnatgan. Soʻngra ushbu fuqaroni Rossiyaga joʻnatish uchun Toshkent viloyatida joylashgan “Navoiy” chegara-bojxona posti orqali Qozogʻistonga oʻtayotganida DXX Navoiy viloyati boʻyicha boshqarmasi tomonidan ushlangan.

N.U. sudda aybiga toʻliq iqror boʻlgan va qilmishidan afsusda ekanini aytib, suddan yengillik soʻragan.

JIB Karmana tuman sudi hukmi bilan N.U. Jinoyat kodeksining 25-moddasi orqali 154-moddasining 2-qismida nazarda tutilgan jinoyatni (yollanma shaxsni yollash, oʻqitish, moliyalashtirish yoki unga boshqa moddiy taʼminot berish, xuddi shuningdek, undan harbiy toʻqnashuv yoki harbiy harakatlarda foydalanish) sodir qilishda aybli deb topilgan. Unga Jinoyat kodeksining 57-moddasini qoʻllagan holda 3 yil muddatga ozodlikdan mahrum qilish jazosi tayinlangan.

Navoiy viloyati sudi jinoyat ishlari boʻyicha sudlov hayʼati apellyatsiya instansiyasi ajrimi bilan dastlabki sud hukmi oʻzgarishsiz qoldirilgan.

Oldinroq Rossiya armiyasiga yollangan navoiylik yigit 4 yil muddatga ozodlikni cheklash jazosiga tortilgandi.