“RES 2026” sammiti: Shavkat Mirziyoyev ekologik hamkorlik bo‘yicha takliflar bildirdi

Sammit BMT ko‘magida o‘tkazilib, suv, energetika, iqlim o‘zgarishi va barqaror rivojlanish bo‘yicha hamkorlikni kuchaytirishga qaratilgan.

Unda suv tanqisligi, yer degradatsiyasi, muzliklarning erishi va bioxilma-xillikning kamayishi kabi ekologik muammolarga alohida e’tibor berilgan.

Ochilish marosimida prezident Shavkat Mirziyoyev asosiy muammolar va mintaqaviy hamkorlik yo‘nalishlarini belgilab berdi.

“Global isish sur’atlarining tezlashishi davom etmoqda, Markaziy Osiyo mintaqasida esa harorat ikki barobar tezroq ko‘tarilmoqda. Mintaqa muzliklarining qariyb uchdan bir qismi yo‘qoldi, yog‘ingarchilik tartibining beqarorligi kuzatilmoqda, suv resurslari tanqisligi ortib bormoqda. Yer maydonlarining 80 million gektari allaqachon degradatsiyaga uchradi”, — dedi Prezident.

 

Shavkat Mirziyoyev ekologik hamkorlikni mustahkamlashga qaratilgan qator tashabbuslarni ilgari surdi:

• sanoatni modernizatsiya qilish va chiqindilarni kamaytirish uchun “yashil” moliyalashtirishni jalb etuvchi “Markaziy Osiyoning toza havosi” davlatlararo konsorsiumini tashkil etish;
• “Green University” huzuridagi cho‘llanishga qarshi kurash markaziga mintaqaviy maqom berish;
• “Markaziy Osiyo yashil savdo yo‘lagi”ni yo‘lga qo‘yish;
• atrof-muhit o‘zgarishlarining yagona mintaqaviy atlasini yaratish;
• “Markaziy Osiyo Qizil kitobi”ni ishlab chiqish;
• ekologik ta’limni rivojlantirish va yoshlarni jalb etish maqsadida 2027-yilda O‘zbekistonda Butunjahon yoshlar iqlim forumini o‘tkazish.

Shuningdek, Samarqandda Global ekologik fondning VIII Assambleyasi va suvni tejash bo‘yicha Jahon forumi kabi yirik xalqaro tadbirlar o‘tkazilishi qayd etildi.

“RES 2026” kun tartibi sakkizta ustuvor yo‘nalishni qamrab oladi – iqlim o‘zgarishiga moslashishdan tortib resurslarni barqaror boshqarish, oziq-ovqat xavfsizligi, havo ifloslanishiga qarshi kurash hamda ekologik va raqamli ko‘nikmalarni rivojlantirishgacha.

Forum dasturidan 58 tadbir o‘rin olgan bo‘lib, ular orasida 17 yuqori darajadagi sessiya, Markaziy Osiyo davlatlari o‘rtasidagi 4 uchrashuv hamda 37 davra suhbati, konferensiya va seminarlar mavjud.

Sammit yakunida Markaziy Osiyo davlatlari rahbarlarining “Markaziy Osiyo ekologik birdamligi” qo‘shma deklaratsiyasi qabul qilinishi kutilmoqda.

Bundan tashqari, 2026–2030-yillar uchun BMT agentliklari bilan hamkorlikdagi Mintaqaviy harakat dasturi tasdiqlanadi.

Umumiy hisobda “RES 2026” doirasida 51 ta hujjat imzolanishi rejalashtirilgan:

-       13 ta memorandum;

-       16 ta qo‘shma bayonot va kelishuvlar;

-       16 ta mintaqaviy va milliy tashabbuslar;

-       6 ta investitsiya loyihasi.