Oʻzbekistonda 6 oyda qancha bojxona toʻlovlari oʻtkazilgani ochiqlandi

Qayd etilishicha,  dastlabki yarim yillikda oʻtgan yilning shu davriga nisbatan tashqi savdo tovarlari 5 foizga, shu jumladan, eksport hajmi 7 foizga, rasmiylashtirilgan bojxona yuk deklaratsiyalari 12 foizga koʻpaygan.

Bojxona chegaralari orqali yukli avtomobillar 165 mingtaga, yukli vagonlar 376 mingtaga, yoʻlovchilar soni 3,3 mln nafar oshgan.

Taʼkidlanishicha, tadbirkorlarni qoʻllab-quvvatlashga qaratilgan chora-tadbirlar natijasida 11 mingdan ortiq tadbirkorlarga 24,6 trln soʻm bojxona toʻlovlaridan imtiyoz va preferensiyalar qoʻllanildi, 2,8 trln soʻm bojxona toʻlovlarini kechiktirib toʻlashga ruxsat berildi.

Davlat byudjetiga 34 trln soʻm bojxona toʻlovlari oʻtkazilib, belgilangan reja ijrosi toʻliq taʼminlandi. Bojxonachilar tomonidan aniqlangan 19 mingdan ziyod kontrabanda va bojxona qonunbuzilishi holatlarida qiymati 564 mlrd soʻmlik tovar-moddiy boyliklarning bojxona chegaralari orqali noqonuniy olib oʻtilishi va ichki hududdagi yashirin aylanmasiga chek qoʻyildi.

Ayniqsa, noqonuniy muomaladan olib qoʻyilgan valyuta qimmatliklari oʻtgan yilning shu davriga nisbatan 3 barobarga, zargarlik buyumlari esa qariyb 2 barobarga ortgan. Hisobot davrida bojxona xodimlari 1247 kg giyohvandlik vositalari, 156 kg psixotrop va kuchli taʼsir etuvchi moddalarni toʻxtatib qoldi.