“Oʻzbekiston Gʻazoda maktab va shifoxonalar qurishga tayyor” — Mirziyoyev

AQSh poytaxtida joylashgan Donald Tramp nomidagi Tinchlik institutida “Tinchlik kengashi”ning inauguratsiya sammiti boʻlib oʻtdi. Nufuzli anjumanda soʻzga chiqqan Oʻzbekiston rahbari global xavfsizlik va mintaqaviy barqarorlik masalalariga toʻxtalib, Gʻazo sektorini tiklash boʻyicha Oʻzbekistonning qatʼiy pozitsiyasini bildirdi.

Prezident oʻz nutqida mazkur muloqot maydonini tashkil etgani uchun AQSh Prezidenti Donald Trampga minnatdorlik bildirdi. Uning taʼkidlashicha, sammitning oʻtkazilishi yuksak siyosiy iroda va xalqaro muammolarga pragmatik yondashuv samarasidir.

Shavkat Mirziyoyev Gʻazoni ijtimoiy-iqtisodiy jihatdan tiklash masalasiga alohida eʼtibor qaratib, hududni boshqarish boʻyicha har qanday tashqi mexanizm, avvalo, mahalliy aholining qoʻllab-quvvatloviga tayanishini qayd etdi. Barcha tomonlarning muvofiqlashtirilgan saʼy-harakatlari mojarodan keyingi jarayonlarni barqarorlashtirishda hal qiluvchi ahamiyat kasb etishi taʼkidlandi.

Prezident Oʻzbekiston Gʻazo hududida hayotiy muhim obʼektlar qurilishiga amaliy hissa qoʻshishga tayyor ekanini maʼlum qildi. Jumladan, quyidagi yoʻnalishlarda loyihalarni amalga oshirish rejalashtirilmoqda:

• zamonaviy turar joy majmualari;
• maktabgacha taʼlim muassasalari va maktablar;
• tibbiyot muassasalari va shifoxonalar.

“Gʻazoning har qanday tashqi boshqaruv mexanizmi sektor aholisining soʻzsiz ichki qoʻllab-quvvatlashiga tayanishi lozim. Barcha tomonlarning muvofiqlashtirilgan saʼy-harakatlari hududni tez fursatda qayta tiklash va barqarorlikni taʼminlashga xizmat qiladi. Oʻzbekiston ushbu jarayonda turar joylar, bolalar bogʻchalari, maktab va kasalxonalar barpo etishga imkon qadar hissa qoʻshishga tayyor”, — dedi davlat rahbari.

Ushbu tashabbus Oʻzbekistonning xalqaro maydondagi masʼuliyatli va tinchlikparvar davlat sifatidagi nufuzini yanada mustahkamlaydi. Vayron boʻlgan ijtimoiy infratuzilmani tiklash esa minglab insonlar hayotini barqaror izga solish va uzoq muddatli tinchlikni taʼminlashga xizmat qiladi.