Pora bilan qoʻlga tushgan 47 amaldor qamaldi

DXX tomonidan ochiqlangan maʼlumotlarga koʻra, amaldorlar telefon qurilmasidan boshlab 6 million AQSh dollargacha pora soʻragan. Mansab egalari asosan AQSh dollarida pora olishni afzal bilishgan. Qoʻlga olinayotganda ularga berilgan boshlangʻich ulushning oʻzi 561 532,67 AQSh dollarini tashkil etgan. 

PARADIGMA.UZ soʻnggi 6 oy ichida Oʻzbekistonda pora bilan qoʻlga tushgan amaldorlar reytingini sizga havola etadi. 

Samarqand viloyatida Oqdaryo tumanining sobiq hokimi va yana 2 shaxs 11,1 gektar yerni rasmiylashtirib berish uchun fuqarodan 6 mln AQSh dollari yoki soʻmga chaqqanda 76 mlrd 438 mln talab qilgan. Ular pulning 200 ming dollarini olayotgan vaqtda ushlangan. 

Buxoro viloyatida esa Kogon tumani prokurori qidiruvdagi shaxsga qoʻllangan qamoq ehtiyot chorasini bekor qilish va jinoyat ishi boʻyicha yengillik qilib berish evaziga 90 ming AQSh dollari olayotganda DXX xodimlari tomonidan qoʻlga olingan. 

Raqobatni rivojlantirish va isteʼmolchilar huquqlarini himoya qilish qoʻmitasining Andijon viloyati hududiy boshqarmasida boʻlim boshligʻi oʻrinbosari tekshiruvlar dalolatnomasini bekor qilib berish evaziga 22,5 ming AQSh dollari olgan vaqtida ushlangan. 

Shuningdek, Asaka tuman hokimligining qishloq xoʻjaligi boʻlimi boshligʻi hamda Kadastr agentligining Asaka tuman boʻlimi boshligʻi 50 sotix davlat yerining toifasini noturar joyga oʻzgartirib, sotish uchun xaridordan 40 ming AQSh dollari talab qilgan. Belgilangan pulning 20 mingini olayotgan paytda qoʻlga olingan. 

Navbatdagi holat ham Andijonda kuzatilgan. Andijon viloyati Transport boshqarmasi boshligʻi vazifasini vaqtincha bajaruvchi mansabdor tenderda gʻoliblikni qoʻlga kiritib berish uchun 7500 AQSh dollari olgan vaqtida ushlangan. 

Yana bir holatda Qashqadaryo viloyati Qarshi tumani prokuraturasi tergovchisi qamoq ehtiyot chorasi qoʻllamaslik evaziga MChJ rahbaridan 5 ming AQSh dollar pora olgan vaqtida xizmat xonasida qoʻlga olingan. 

Qashqadaryodan uzoqlashmaymiz. Koʻkdala tumani hokimining oʻrinbosari fuqarodan 5 ming AQSh dollar talab qilib, pulning 15 mln soʻm (1200 AQSh dollar) qismini olgan vaqtida qoʻlga olingan. 

Bundan tashqari, majburiy ijro byurosining Toshkent shahar boshqarmasi katta inspektori korxonaga tegishli koʻchmas mulklarni yuqori baholab berish evaziga 2500 AQSh dollari olgan vaqtida DXX xodimlari tomonidan ushlangan. 

Namangan viloyatida Mingbuloq tuman sudi raisi esa sudlanuvchiga nisbatan yengilroq jazo tayinlash evaziga, uning otasidan 2000 AQSh dollari olgan vaqtida qoʻlga tushgan. 

Ushbu jinoyatlarni sodir etgan amaldorlarga nisbatan jinoyat ishi qoʻzgʻatilib, tegishli moddalar asosida jinoiy javobgarlikka tortilgan.