QQS bilan bogʻliq yirik firibgarlik fosh etildi

Davlat xavfsizlik xizmati va Iqtisodiy jinoyatlarga qarshi kurashish departamenti xodimlari tomonidan qoʻshilgan qiymat soligʻiga oid korrupsiyaviy holat aniqlandi.

Maʼlum boʻlishicha, avval soliq idoralarida ishlagan, hozirda Toshkent shahridagi transport va logistika xizmatlari koʻrsatuvchi MChJda hisobchi boʻlib ishlayotgan shaxs boʻyoq mahsulotlari ishlab chiqaruvchi MChJga 17 mlrd soʻmlik QQSning manfiy farq summasini qaytarish va uning toʻxtatilgan guvohnomasini qayta faollashtirish uchun 35 ming AQSh dollari pora talab qilgan.

Tezkor tadbirda u MChJ taʼsischisidan 20 500 AQSh dollari olgan paytda ashyoviy dalillar bilan ushlandi.

Holat yuzasidan hisobchi va boshqalarga nisbatan Jinoyat kodeksining 168-moddasi 4-qismi «a» bandi hamda 28,211-moddasi 3-qismi «a» bandi bilan jinoyat ishi qoʻzgʻatildi.

Dastlabki tergov jarayonida mazkur mablagʻni hal etishda Soliq qoʻmitasining katta inspektori ham ishtirok etgani maʼlum boʻlib, u ham gumonlanuvchi sifatida jinoyat ishiga jalb etildi.