Qoʻqonlik «tabib» yana sudga tortildi

 Bu haqda 16 dekabr kuni Fargʻona viloyati IIB matbuot xizmati xabar qildi.

Maʼlum qilinishicha, uning faoliyati qonuniyligi oʻrganilganida Iqbol Soliyev 2020 yil avgust oyida soliq organlarida «Xalq tabobati» faoliyat turi boʻyicha roʻyxatdan oʻtgani aniqlangan. Biroq Oʻzbekiston Xalq tabobati assotsiatsiyasi tomonidan berilgan guvohnomaning amal qilish muddati 2024 yil dekabr oyida tugagani maʼlum boʻlgan.

Ushbu holat yuzasidan Qoʻqon shahar IIB tomonidan tegishli tartibda hujjatlar rasmiylashtirilib, Jinoyat ishlari boʻyicha Qoʻqon shahar sudiga yuborilgan. Sudning 2025 yil 10 yanvardagi qaroriga koʻra, Iqbol Soliyev Maʼmuriy javobgarlik toʻgʻrisidagi kodeksning 59-5-moddasi 1-qismi (xalq tabobati toʻgʻrisidagi qonunchilikni buzish) bilan aybdor deb topilib, 7,5 million soʻm miqdorida jarimaga tortilgan.

Shuningdek, uning ijtimoiy tarmoqlardagi chiqishlari fuqarolarning eʼtiroziga sabab boʻlgani inobatga olinib, ichki ishlar organlari xodimlari tomonidan rasmiy ogohlantirish berilgan.

Shunga qaramay, Iqbol Soliyev oʻz faoliyatini takroran davom ettirib, ijtimoiy tarmoqlarda videoroliklar joylashtirib kelgani aniqlangan. Shu munosabat bilan 27 noyabr kuni Qoʻqon shahar IIB tomonidan unga nisbatan Maʼmuriy javobgarlik toʻgʻrisidagi kodeksning 59-5-moddasi 3-qismi — maʼmuriy jaza qoʻllanilganidan keyin bir yil davomida takroran huquqbuzarlik sodir etilgani boʻyicha hujjatlar rasmiylashtirilib, sud organlariga yuborilgan.

Qonunchilikka koʻra, xalq tabobati toʻgʻrisidagi qonun talablarini bir yil ichida takroran buzish bazaviy hisoblash miqdorining 20 baravaridan 30 baravarigacha (8 million 240 ming soʻmdan 12 million 360 ming soʻmgacha) jarima yoki 15 sutkagacha maʼmuriy qamoq jazosiga sabab boʻlishi mumkin.