Qoʻy jon dardida, qassob goʻsht dardida: Toshkent viloyat hokimliligi Chorvoqdagi kurort haqida bayonot berdi

Bayonotda aytilishicha, “Sea Breeze” kurort majmuasi loyihasi doirasida Chorvoq suv ombori boʻyida 577 gektar yer maydoni va unga tutash 3 ming gektarlik hududda keng qamrovli ishlar rejalashtirilgan.

Shuningdek, kurort qurilishida 10 mingdan ziyod ish oʻrni yaratilishi hamda  turizm eksporti 500 million AQSh dollarga yetishi mumkin. Shuningdek, viloyatga chet ellik sayyohlar oqimi esa yiliga 5 million nafargacha koʻpayishi mumkin.

Hokimlikning yozishicha, loyiha amalga oshirilishining barcha bosqichlari ekologiya, qurilish, kadastr va sanitariya sohalari boʻyicha viloyat tuzilmalari tomonidan tizimli nazoratga olinishi taʼminlanadi.

Shu bilan birga loyihaga yer uchastkalarini ajratish, ijaraga berish va qayta rasmiylashtirish boʻyicha barcha jarayonlar tasdiqlangan master-reja asosida, ekologik talablar inobatga olingan holda va ochiq monitoring sharoitida amalga oshirilishi nazorat qilinadi.

“Vazirlar Mahkamasi qarorida belgilangan tartibda yerdan foydalanish huquqiga ega boʻlgan barcha fuqarolarga kompensatsiyalar toʻlanadi”, —deyiladi hokimlik bayonotida.

Maʼlumot uchun, Ilhom Aliyevning sobiq kuyovi investor Emin Agalarov Chorvoqda Sea Breeze kurort loyihasini joriy yil boshida prezident Shavkat Mirziyoyevga taqdim qildi. Shundan soʻng, ekolog va jamoatchilikda norozilik kelib chiqdi. Kurort quriladigan joy Chorvoq suv omborining qirgʻoqlarida joylashgan. Toshkent shahri mazkur suvdan deyarli barcha sohalarda foydalanadi.

Ekologlarga koʻra, suv atrofida bunday qurilish qilish suvga jiddiy zarar yetish hamda zaharlanishi mumkin.

Ekologiya vazirining bu loyiha hali vazirlikka yetib kelmaganini, agar kelsa ekologik ekspertizadan oʻtishi hamda loyiha muhokama uchun jamoatchilikka taqdim etilishi aytilgan edi. Biroq, 1 avgust kuni  loyiha Vazirlar Mahkamasi Chorvoqdagi 577 gektar yer maydonini 5 mlrd AQSh dollar evaziga ushbu kurort majmuasini barpo qilish sharti bilan “Sea Breeze Uzbekistan” MChJ ga 25 yilga toʻgʻridan-toʻgʻri ijaraga berish sharti bilan Vazirlar Mahkamasi 490-sonli qarorini eʼlon qildi.

Ochiq manbalarga koʻra, bu tashkilot 4 avgust kuni tashkil etilgan yaʼni qaror qabul qilinganidan 3-kun oʻtib. MChJning 50 foiz aksiyasi “Agalarov Development” qolgan 50 foizi esa, Maxmudov Ulugʻbek Abdurasulovichga tegishli.