Samarqandda profilaktika inspektorini urgan shaxslarga jinoiy ish qoʻzgʻatildi

Unda qayd etilishicha, joriy yilning 23 iyul kuni soat 17:30 larda Samarqand shahar “Siyob” mahallasida yashovchi fuqaro navbatchilik qismining “102” qisqa raqamiga murojaat qilgan. U Oqdaryo tumani “Navroʻz” mahallasi Zarafshon koʻchasida joylashgan koʻp qavatli uylar oldida notanish fuqarolar unga tegishli “Nexia-3” rusumli avtomashinasining oynalarini sindirib, oʻzini urib, tan jarohati yetkazganligini aytgan.

Shundan soʻng, Oqdaryo tumani ichki ishlar boʻlimi inspektori voqea joyiga yetib borib, janjal qilgan fuqarolarni “Navroʻz” mahallasida joylashgan xizmat xonasiga olib borgan. Holatga aniqlik kiritish maqsadida murojaat qilgan fuqaro bilan suhbatlashib turgan vaqtida 35 va 19 yoshli yigitlar hamda 45-50 yoshlar atrofidagi ayol “nima uchun xizmat xonasiga birinchi bizni kiritmaysan, biz ham “102” raqamiga murojaat qilganmiz”, deya janjal koʻtargan.

Inspektor ularga ishiga xalal bermay turishini, navbat bilan gaplashishini aytgan vaqtida fukarolar xodimni haqoratli soʻzlar bilan soʻkib, xonadan chiqib ketgan. Inspektor ularga ketib qolmasligini, holat boʻyicha tushuntirish xatlari olishi lozimligini aytgan vaqtida, ayol kishi kelib xodimning kiyimidan tortib qattiq haqoratlaydi. Buni koʻrgan ikki erkak ham profilaktika inspektorini urib-tepgan va yiqitib tanasining turli joylariga tan jarohati yetkazgan.

“Hozirda mazkur holat yuzasidan Oqdaryo tuman prokuraturasi tomonidan jinoyat ishi qoʻzgʻatilib, 3 nafar gumonlanuvchilar protsessual tartibda qamoqqa olingan”,

 deyiladi xabarda.