Samarqandda qimorga mukkasidan ketgan shaxs aka va ukasining qiynogʻidan soʻng vafot etdi

Samarqand shahrida qimorga berilgan oʻrtancha oʻgʻilning oʻlimiga sabab boʻlgan aka-uka jinoiy jazoga tortildi. Kun.uz sud hujjati bilan tanishdi.

Sud hukmida keltirilishicha, 30 yoshli U.A. va 23 yoshli Q.A. oʻrtancha oʻgʻil J.A.ni qimor oʻyinidan qaytarish maqsadida «tarbiyalab» qoʻymoqchi boʻlishgan. Ular 2025 yil 20 iyun kuni soat 15:00 larda yashash uylarida J.A.ni kaltaklab, arqon bilan hovlidagi daraxtga bogʻlab qoʻyishgan. Soʻngra U.A. gʻayriqonuniy ravishda ozodlikdan mahrum qilingan J.A.ning tanasining turli qismlariga sim kabel bilan shafqatsizlarcha urib, unga qasddan jarohat yetkazgan. Oqibatda ogʻir tan jarohati olgan J.A. hodisa joyida vafot etgan.

U.A. sudda aybiga toʻliq iqrorlik billirgan va maqsadi ukasini qimordan qaytarish boʻlganini aytgan.

«Oʻrtancha ukam J.A. ayrim fuqarolardan qarz boʻlib qolgandi. Topgan pulini onlayn qimorga tikib yuborardi. Uydagi koʻp narsalarni, turmush oʻrtogʻi, hatto onamga tegishli boʻlgan tilla taqinchoqlarni ham sotib, pullarini onlayn qimorga sarflab yubordi. 

2025 yil 20 iyun kuni tushlikka yaqin ukamning oldiga borib, toʻlashi lozim boʻlgan krediti nima boʻlganini soʻradim. U pullarni qimorga tikib, yutqazib qoʻygani, ishlab toʻlashini aytdi. Uning gaplaridan jahlim chiqib, ogʻzaki tarzda tortishib qoldim. Soʻngra uni bu yoʻldan qaytarish maqsadida kichik ukam Q.A.ga qoʻngʻiroq qilib, uni chaqirdim.

Shu kuni soat 15:00 lar atrofida J.A.ni urdik. Soʻngra arqon bilan hovli oʻrtasidagi daraxtga bogʻladik. Shundan keyin taxminan 30 daqiqa tanasining duch kelgan joylariga sim kabel bilan urdim. Kichik ukam esa yonimda qarab turdi. J.A.ning yuzi, boshi va tanasi shilinib, qon oqa boshladi. Keyin uni arqondan boʻshatib, yuvintirdik hamda tashqaridagi krovatga yotqizdik. J.A. issiq ekanini aytgach, uyga olib kirdik. Soʻngra u dam olishini aytib, uxladi. Ancha vaqt oʻtgach tobi qochdi, yuragi sekin ura boshladi. Tez tibbiy yoram chaqirdik. Yetib kelgan shifokorlar ukam vafot etganini aytishdi», degan U.A. suddagi koʻrsatmasida.

Aka qilgan ishidan pushaymonligini aytib, bir ukasining oʻlimiga, kichik ukasining qamalishiga sababchi boʻlganidan vijdon azobida qiynalayotganini bildirgan.

Q.A. ham sudda akasinikiga oʻxshash koʻrsatma bergan.

J.A.ning otasi I.T. ham sudda koʻrsatma berib, oʻrtancha oʻgʻli qimorga berilgan boʻlgani, odamlardan qarzi koʻpayib ketganini maʼlum qilgan.

«Oʻrtancha oʻgʻlimning ishi yaxshi edi, u payvandlash ishlari bilan shugʻullanardi. 3-4 yildan buyon onlayn qimor oʻyinlariga berilib qoldi. Bu kabi oʻyinlarni oʻynamasligi haqida bir necha marta tayinlab, tanbeh berganman. Ammo u gapimga kirmadi, ishlagan pulini onlayn qimor oʻyinlariga tikib yuboraverdi. Uyga biror marta pul olib kelmagan. Akasi va ukasi ham qimor oʻynamasligi, oxiri baribir qarz boʻlib qolishini aytishsa-da, ular bilan janjal qilardi. Qarzi koʻpayib ketdi, odamlar uyiga pulini soʻrab kelaverganidan soʻng akasi va ukasi qarzlarini toʻlab berishni boshladi. Lekin u odamlardan ham, bankdan ham qarz olib, topgan pulining hammasini onlayn qimorga tikishdan qaytmadi», degan ota.

I.T. sudda kichik oʻgʻliga qamoq bilan bogʻliq boʻlmagan jazo tayinlashni soʻragan. 

Samarqand shahar sudi hukmi bilan U.A. va Q.A. Jinoyat kodeksining 138-moddasi (Zoʻrlik ishlatib gʻayriqonuniy ravishda ozodlikdan mahrum qilish) 2-qismi «a» bandi va 104-moddasi (Qasddan badanga ogʻir shikast yetkazish) 3-qismi «d» bandida nazarda tutilgan jinoyatlarni sodir qilganlikda aybli deb topilgan. Akaga 8,5 yil, ukaga esa 6,5 yil muddatga ozodlikdan mahrum qilish jazosi tayinlangan.