Самарқандда профилактика инспекторини урган шахсларга жиноий иш қўзғатилди

Унда қайд этилишича, жорий йилнинг 23 июль куни соат 17:30 ларда Самарқанд шаҳар “Сиёб” маҳалласида яшовчи фуқаро навбатчилик қисмининг “102” қисқа рақамига мурожаат қилган. У Оқдарё тумани “Наврўз” маҳалласи Зарафшон кўчасида жойлашган кўп қаватли уйлар олдида нотаниш фуқаролар унга тегишли “Nexia-3” русумли автомашинасининг ойналарини синдириб, ўзини уриб, тан жароҳати етказганлигини айтган.

Шундан сўнг, Оқдарё тумани ички ишлар бўлими инспектори воқеа жойига етиб бориб, жанжал қилган фуқароларни “Наврўз” маҳалласида жойлашган хизмат хонасига олиб борган. Ҳолатга аниқлик киритиш мақсадида мурожаат қилган фуқаро билан суҳбатлашиб турган вақтида 35 ва 19 ёшли йигитлар ҳамда 45-50 ёшлар атрофидаги аёл “нима учун хизмат хонасига биринчи бизни киритмайсан, биз ҳам “102” рақамига мурожаат қилганмиз”, дея жанжал кўтарган.

Инспектор уларга ишига халал бермай туришини, навбат билан гаплашишини айтган вақтида фукаролар ходимни ҳақоратли сўзлар билан сўкиб, хонадан чиқиб кетган. Инспектор уларга кетиб қолмаслигини, ҳолат бўйича тушунтириш хатлари олиши лозимлигини айтган вақтида, аёл киши келиб ходимнинг кийимидан тортиб қаттиқ ҳақоратлайди. Буни кўрган икки эркак ҳам профилактика инспекторини уриб-тепган ва йиқитиб танасининг турли жойларига тан жароҳати етказган.

“Ҳозирда мазкур ҳолат юзасидан Оқдарё туман прокуратураси томонидан жиноят иши қўзғатилиб, 3 нафар гумонланувчилар процессуал тартибда қамоққа олинган”,

 дейилади хабарда.