Sangardakda yangi loyiha qurilishi boshlandi

Surxondaryo viloyatidagi maftunkor sharsharasi bilan olamga mashhur Sangardak qishlogʻida Avstriyaning "INPUT Projektentwicklungs-GmbH" kompaniyasi ishlab chiqqan loyiha asosida yana bir zamonaviy turistik maskan qurilishi boshlandi.

Goʻzal togʻlar qoʻynidagi 16 gektar maydonda qad rostlaydigan loyiha hududning relefi, tabiiy landshafti va togʻli-rekreatsion imkoniyatlarini eʼtiborga olgan holda ishlab chiqilgan. U funksional va ekologik jihatdan maqbul yechimlarni oʻz ichiga oladi.

Prezidentning 2024 yil 16 dekabrdagi “Surxondaryo viloyatining togʻli-rekreatsion hududlarida turizm infratuzilmasini yaxshilash hamda zamonaviy xizmat koʻrsatish va turizm obʼektlarini barpo etish chora-tadbirlari toʻgʻrisida” gi qaroriga muvofiq 615 gektar maydonda bunyod etilayotgan "Sangardak" turistik markazi qurilishi uchun 913 milliard soʻmdan ortiq mablagʻ sarflanishi moʻljallanmoqda.

Tajribali mutaxassislar ishlab chiqqan master-rejaga koʻra, turistik markaz tarkibida 21 ta restoran, kafe va bar, 296 ta savdo nuqtasi, 4 ta uch yulduzli va 2 ta besh yulduzli mehmonxona, 10 ta mehmon uyi, sanatoriy, madaniy hordiq maskani, 1,6 kilometr uzunlikdagi dor yoʻli, ziplayn trassasi va piknik hududlari qurilishi rejalashtirilgan. 

Ayni paytda loyihalarni amalga oshirish uchun tanlangan yer maydonlari bosqichma-bosqich auksion savdolariga chiqarilmoqda.