“Transport vazirligi turizm rivojiga yetarli darajada hissa qoʻshmayapti” – Alisher Qodirov

Oliy Majlis Qonunchilik palatasidagi “Milliy tiklanish” demokratik partiyasi fraksiyasining yigʻilishida fraksiya aʼzolari dastlab davlat byudjeti va davlat maqsadli jamgʻarmalari byudjetlarining 2025 yil birinchi yarim yilligidagi ijrosini muhokama qildilar.

Deputatlar partiya dasturiy vazifalaridan kelib chiqqan holda taʼlim-tarbiya, darsliklar, madaniy meros va turizm masalalariga alohida eʼtibor qaratdilar. Jumladan, taʼlimga ajratilgan mablagʻlar yetarlicha oʻzlashtirilmagani masalasi koʻtarildi. Masalan, joriy oʻquv yili boshlanganiga qaramay, darsliklar uchun ajratilgan mablagʻning atigi 75 foizi oʻzlashtirilgan. Bu esa umumtaʼlim maktablarida darsliklar bilan bogʻliq muammolarni yuzaga keltirishi shubhasiz. 

Bundan tashqari, bogʻchalarni kitob va qoʻllanmalar bilan taʼminlash masalasiga toʻxtalib oʻtildi. Qayd etilganidek, mamlakatimizda yetti mingga yaqin davlat bogʻchalari bor. Ammo ular uchun chop etilayotgan kitoblar nusxasi 1000 nusxadan oshmayapti. Fraksiya aʼzolari bolalarda kitob oʻqish koʻnikmasi bogʻchadan boshlanishini taʼkidlab, bu borada vazirlik bolalarbop kitob va didaktik qoʻllanmalarni nashr etish va MTTlarga yetkazib berishi zarurligini qayd etdilar.

Shuningdek, fraksiya rahbari Alisher Qodirov Transport vazirligi mutasaddilariga "Uzbekistan Airways" AJ aviakompaniyasi va “Oʻzbekiston temir yoʻllari” AJ tomonidan yoʻlovchilarga qulaylik yaratish, chiptalarni bemalol sotib olish imkonini yaratish, turizm rivojiga hissa qoʻshish borasida qanday choralar koʻrilayotgani haqida izoh soʻradi:

—  Qachon samolyot va poyezdlarimizga bemalol chipta sotib olish imkoni boʻladi? Samolyotlar soni qachon koʻpaytiriladi? Yurtimizning tarixiy va turistik shaharlariga sayyohlar kelyapti, ammo buning uchun infratuzilma yetarli emas. Turistik shaharlarimizga xohlagan paytda samolyotda keta olish imkoni yoʻq, chunki har kunlik reys mavjud emas. Yoʻlovchi oqimi koʻp, ammo sharoit yetarli emas. Transport vazirligi turizm rivojiga yetarli darajada hissa qoʻshmayapti. Bu borada uzoq yilga moʻljallangan strategiyasi ham mavjudligiga shubhamiz bor. 

Bundan tashqari, ayrim turistik obʼektlarga olib boradigan transport yoʻllarining ahvoli abgor holatda. Masalan, koʻp ming yillik tarixga ega Sarmishsoyga boradigan yoʻl achinarli. Bu kabi muammolarni bartaraf etish turizm imkoniyatlarimizni yanada oshiradi. Buning uchun Turizm qoʻmitasi ham tashabbuskor boʻlishi lozim, — dedi fraksiya rahbari. 

Shuningdek, yigʻilishda Madaniy meros agentligiga ajratilgan mablagʻlarning 59 foizi oʻzlashtirilgani, muzeylar moddiy-texnik bazasini yaxshilash uchun oʻzlashtirilgan mablagʻ esa atigi 18 foizni tashkil qilgani aytilib, agentlik vakillaridan izoh soʻraldi. 

Muhokamalarda koʻtarilgan barcha savollar boʻyicha tegishli mutasaddilarning javoblari tinglandi. Byudjet ijrosida samaradorlikni taʼminlash, sohalardagi muammolarni hal etishda mablagʻlardan maqsadli foydalanish boʻyicha tavsiyalar berildi.