Saudiya Arabistonida mushkul ahvolda qolgan bir guruh ziyoratchilar Oʻzbekistonga qaytarildi

Bosh konsulxonadan olingan maʼlumotga koʻra, Oʻzbekiston fuqarosi D.I. ariza bilan murojaat qilib, sayyohlik firmalaridan biri tomonidan Umra amallarini bajarish uchun kelgan 50 nafar oʻzbekistonlik ziyoratchilar Makkada Vatanga qaytish uchun aviachiptalarsiz qolib ketgani bois, ularni Oʻzbekistonga qaytarib yuborish masalasida amaliy yordam soʻragan.

Taʼkidlanishicha, taqdim etilgan aviachiptaga binoan, ziyoratchilar joriy yil 15 centyabr kuni Umra ibodatlarini yakunlab, "Centrum Air" aviakompaniyasining "Jidda – Toshkent" yoʻnalishidagi samolyoti bilan Vatanga qaytishlari kerak boʻlgan.

Biroq, sayyohlik firmasi tomonidan ziyoratchilarning Vatanga qaytib ketmaslik sababi tushuntirilmagan, faqat yaqin kunlarda Oʻzbekistonga qaytib ketishlari mumkinligi aytilgan. Ziyoratchilarning aksariyati yoshi keksalar va ayollar boʻlgani tufayli ular vahimaga tushib qolgan.

Bosh konsulxona vakillari sayyohlik kompaniyasi masʼul xodimi bilan bogʻlanib, ziyoratchilarni xavfsiz va tez fursatlarda Oʻzbekistonga qaytarish masalasini muhokama qildi.

Firma vakillariga koʻra, aviachiptalarga masʼul hamkorlar bilan yuzaga kelgan baʼzi muammolar bois, ziyoratchilarga oldindan rejalashtirilgan yoʻnalishga aviachiptalarni oʻz vaqtida sotib olishning imkoni boʻlmagan.

Vaziyat Bosh konsulxona tomonidan nazoratga olindi va firmaga ziyoratchilarni mehmonxona bilan taʼminlash hamda aviachiptalar xarid qilish yuzasidan tegishli tavsiyalar berildi.

Barcha hamyurtlarimiz vaqtincha Makka shahridagi "Samaa Al-Misk Hotel" mehmonxonasiga joylashtirildi.

Olib borilgan muzokaralar natijasida sayyohlik firmasi tomonidan ziyoratchilar uchun aviachiptalar xarid qilindi. Ziyoratchilar 17 sentabr kuni "Fly Khiva" aviakompaniyasining "Madina – Toshkent" yoʻnalishidagi samolyoti bilan Oʻzbekistonga kuzatib qoʻyildi.