Senat chiqindi qarzdorligi sababli elektrga toʻlov qilolmaslik mexanizmini tanqid qildi

Senatning Agrar, suv xoʻjaligi masalalari va ekologiya qoʻmitasi chiqindilarni toʻplash va olib chiqish xizmatlari sohasida toʻlov intizomini, qonun ijrosini taʼminlash mexanizmlari hamda amaliyotda yuzaga kelayotgan muammolar yuzasidan mutasaddi vazirlik va idoralarga aniq manzilli savollar yoʻllandi.

Taʼkidlanishicha, joriy yil 7 martda qabul qilingan OʻRQ-1044-son qonunga muvofiq maishiy chiqindilar xizmati uchun majburiy toʻlov boʻyicha qarzdorlik mavjud boʻlgan taqdirda, isteʼmolchi mazkur qarzdorlik haqida SMS orqali ogohlantirilganidan soʻng 5 kun ichida qarzdorlikni bartaraf etmasa, elektr energiyasi boʻyicha toʻlovlarni qabul qilish vaqtinchalik toʻxtatilishi nazarda tutilgan.

Biroq «Hududiy elektr tarmoqlari» AJning «HET» ilovasida aholi tomonidan maishiy chiqindi xizmati boʻyicha qarzdorlik haqidagi maʼlumotlar aks etmayotgani, «Toza makon» elektron billing tizimi bilan «Hududiy elektr tarmoqlari» AJning billing tizimi oʻrtasida toʻliq integratsiya taʼminlanmagani, shuningdek, ayrim isteʼmolchilarda chiqindi xizmati boʻyicha shartnoma mavjud emasligi hamda abonent hisob raqamlarida noaniqliklar tanqid ostiga olindi.

Yuqoridagi holatlardan kelib chiqib, Senat qoʻmitasi tomonidan Ekologiya, atrof-muhitni muhofaza qilish va iqlim oʻzgarishi vazirligiga hamda Energetika vazirligiga maʼlumotlar almashinuvi jarayonida yuzaga kelayotgan muammolar yuzasidan aniq maʼlumot va ularni bartaraf etish boʻyicha amaliy takliflar taqdim etish soʻraldi.

Maʼlumot uchun, 2024 yilgi qonunchilik oʻzgarishlariga binoan, 1 avgustdan boshlab chiqindi xizmati uchun qarzdor isteʼmolchilar har oyning 5-sanasigacha SMS-xabar oladi. Qarzni 5 kun ichida toʻlamagan taqdirda, elektr energiyasi uchun toʻlovni amalga oshirish imkoniyati vaqtincha toʻxtatiladi.