Senatorlar joriy yilning birinchi yarmida 85 qonunni koʻrib chiqdi

Senat yalpi majlisida joriy yilning birinchi yarmida amalga oshirilgan ishlarga toʻxtalib oʻtildi. Qonunchilik yoʻnalishida jadal ish olib borilgani, xususan, 85 qonun koʻrib chiqilgani qayd etildi.

Yangi konstitutsiyaviy vakolatlardan kelib chiqib, senatorlar qonunchilik tashabbusini ilgari surishga alohida eʼtibor qaratgan. Qoʻmitalarda turli soha va yoʻnalishlarga oid 10 ga yaqin qonunchilik takliflari ustida faol ish olib borilmoqda.

– Nazorat-tahlil faoliyati doirasida asosiy vaqtimiz hududlarda oʻtdi, desak xato boʻlmaydi, – dedi Senat raisi T.Norboyeva.  – 60 ga yaqin tadbir oʻtkazilib, muayyan soha, tarmoq va hududlarni rivojlantirishning dolzarb masalalariga oid vazifa, tavsiya, koʻrsatmalar belgilab berildi. Oʻrganishlar, tahlillar va koʻp sonli aholi murojaatlari asosida bolalar salomatligini asrash, agrar sohani rivojlantirish, mehnat qonunchiligiga rioya qilish va aliment masalalariga oid dolzarb masalalar yuzasidan ijro organlariga toʻrtta parlament soʻrovi yuborildi. 

Joylardagi 10 ga yaqin muammoli masalalar yalpi majlis minbariga olib chiqilib, ularni samarali hal etish chora-tadbirlari belgilandi. Shuningdek, turli yoʻnalishlardagi dolzarb masalalar yuzasidan mutasaddi vazirlik, idoralarga 30 dan ziyod senator soʻrovlari yuborilib, ijobiy yechim topilishi taʼminlandi.   

5,2 mingdan ziyod aholi murojaati koʻrib chiqilib, ularning har toʻrttadan bittasi alohida nazoratga olindi va 70 foizdan ziyodi qanoatlantirildi.

Mahalliy kengashlar bilan hamkorlik yangi pogʻonaga koʻtarildi. 

Senatning joriy yil ikkinchi yarmiga moʻljallangan ish rejasi shakllantirildi. Unda 10 ga yaqin soha va yoʻnalishlarga oid qonunchilikni takomillashtirish, 30 ga yaqin yoʻnalishlarda nazorat-tahlil tadbirlari (qonunlar, dasturlar ijrosi), shuningdek, xalqaro aloqalar va mahalliy kengashlar bilan hamkorlikka oid 20 dan ziyod vazifalar hamda boshqa muhim tadbirlar aks ettirilgan.