Senat qoʻmitalarida sunʼiy intellekt hamda rieltorlik faoliyatiga oid qonunlar koʻrib chiqildi

Sunʼiy intellekt texnologiyalari barcha sohalarning samarali faoliyatiga ijobiy taʼsir koʻrsatayotgani qayd etildi. Sunʼiy intellekt bugungi kunda insoniyatga keng imkoniyat taqdim etish bilan birga, ijtimoiy-siyosiy jarayonlarga, xususan inson huquqlariga va shaxsga doir maʼlumotlar daxlsizligiga tahdidlarni yuzaga keltira boshladi.

Shu sababli, sunʼiy intellekt texnologiyalari sohasidagi munosabatlarni huquqiy tartibga solish zarur. Shu munosabat bilan amaldagi bir qator qonunlarga qoʻshimcha va oʻzgartirishlar kiritilmoqda. Xususan, qonunchilikda “sunʼiy intellekt” tushunchasiga taʼrif berilmoqda. Ushbu sohadagi davlat siyosatining asosiy yoʻnalishlari hamda maxsus vakolatli organning vazifalari, axborot resurslarini yaratishda hamda axborot tizimlari ishida sunʼiy intellektdan foydalanishning umumiy qoidalari belgilanmoqda.

Sunʼiy intellekt texnologiyalaridan foydalangan holda yaratilgan axborot resurslariga markirovka qoʻyish tartibi, ular yordamida qonunga xilof ravishda shaxsga doir maʼlumotlarga ishlov berish va ularni OAV yoki Internet jahon axborot tarmogʻida tarqatishga yoʻl qoʻymaslik majburiyati belgilanmoqda.

Maʼmuriy javobgarlik toʻgʻrisidagi kodeksda sunʼiy intellekt vositasida shaxsga doir maʼlumotlar toʻgʻrisidagi qonunchilikni buzganlik uchun javobgarlik choralari belgilanishi nazarda tutilmoqda.

***

Senatning Byudjet va iqtisodiy masalalar qoʻmitasi majlisida rieltorlik faoliyatini takomillashtirish hamda tadbirkorlik subʼektlarini qoʻllab-quvvatlashga qaratilgan qonunlar dastlabki tarzda muhokama qilindi.

Senatorlar rieltorlik sohasida huquqni qoʻllash amaliyotini takomillashtirish orqali rieltorlik xizmatlari sifatini oshirish zarurati yuzaga kelayotganligi taʼkidlandi.

Qonunning qabul qilinishi davlat organlarining rieltorlik faoliyati sohasidagi professional jamoat tashkilotlari bilan oʻzaro munosabatlarini kengaytirib, rieltorlik xizmatlari sifati va raqobatbardoshligini oshirishga xizmat qiladi.

“Oʻzbekiston Respublikasining ayrim qonun hujjatlariga tadbirkorlik subʼektlarini qoʻllab-quvvatlash orqali aholi bandligini taʼminlashga hamda qoʻshilgan qiymati yuqori boʻlgan tovarlar ishlab chiqarishni kengaytirishga qaratilgan qoʻshimcha va oʻzgartirishlar kiritish toʻgʻrisida”gi qonun bilan Fuqarolik kodeksi hamda “Tadbirkorlik faoliyati erkinligining kafolatlari toʻgʻrisida”gi qonunga moliya-xoʻjalik faoliyatini amalga oshirmayotgan tadbirkorlik subʼektlarini tugatish tartibini soddalashtirishga doir qoʻshimcha va oʻzgartirishlar kiritilmoqda.

Endilikda mazkur qonun bilan harakatsiz rejimda boʻlgan faoliyat koʻrsatmayotgan tadbirkorlarni roʻyxatdan oʻtkazuvchi organning qaroriga koʻra tugatish muddati uch yildan bir yilga oʻzgartirilmoqda hamda ushbu qoidani yakka tartibdagi tadbirkorlarga ham qoʻllashni nazarda tutuvchi norma Fuqarolik kodeksida oʻz aksini topadi.

Muhokamalar yakunida qoʻmitalarning tegishli qarorlari  qabul qilindi.