Oʻzbekistondagi voqea diqqat-eʼtiborimiz markazida — Mariya Zaxarova. Rossiya nimaga shama qilmoqda?

Avvalroq, tarmoqlarda Toshkent shahar Chilonzor tumanida joylashgan 188-umumtaʼlim maktabida 6-sinf oʻquvchi rus tili fani oʻqituvchisi tomonidan kaltaklangani tasvirlangan video tarqalgan edi. Mazkur holat yuzasidan Toshkent shahar maktabgacha va maktab taʼlimi boshqarmasi munosabat bildirgan. 

Munosabatda oʻquvchi darsda oʻqituvchisiga gap qaytarib, u bilan tortishib qolgani, janjal vaqtida oʻqituvchi oʻquvchini qulogʻidan choʻzib, oʻtirgan partasidan tortib olib chiqqani hamda yuziga tarsaki urgani, biroq bolaga shikast yetmagani qayd etilgan. Hatto yuqoridagi holat boʻyicha, oʻqituvchiga nisbatan huquq-tartibot organlari tomonidan surishtiruv ishlari olib borilayotgani maʼlum qilingan. 

Xoʻsh, masala hal, oʻqituvchiga jazo tayinlanadi, hech qursa ishdan ketadi deyotgan boʻlsangiz ham kerak. Ha, albatta, bu taxminlaringiz yuz foiz boʻlmasa ham haqiqatga toʻqson foizga yaqin. Ammo muammo boshqa. 

Mazkur video tarmoqlardagi oʻzbek auditoriyasining muhokamalaridan tushgani bilan Rossiya mansab egalarining eʼtiboridan chetda qolib ketmadi. Yaʼni yuqorida taʼkidlaganimizdek, davlatning Tashqi ishlar vazirligi matbuot kotibi Mariya Zaxarova Oʻzbekistondan tushuntirish soʻradi.

"Ijtimoiy tarmoqlarda tarqalgan Toshkentdagi 188-maktabda rus tili darsi oʻtilayotganda oʻqituvchi va oʻquvchi oʻrtasida boʻlgan voqeaga qanday izoh berasiz?", deya Oʻzbekiston hukumatiga savol yoʻllagan u.

Shuningdek, Zaxarova mazkur holat aks etgan video mazmunidan nihoyatda tashvishlanganini ham bildirgan.

"Ikki davlat oʻrtasidagi strategik sheriklik va ittifoqchilikka asoslangan doʻstona munosabatlarda hech qanday adovatga, ayniqsa, til masalasidagi adovatga oʻrin yoʻq va boʻlishi ham mumkin emas", deydi u.

Bundan tashqari, Zaxarova Rossiya Oʻzbekistonda yuz bergan hodisaga huquqiy baho berishni va bolaga nisbatan shafqatsizlik qilgan aybdorga qarshi choralar koʻrishni talab ham qilgan.

"Bu masalani diqqat-eʼtiborimiz markazida tutamiz", deya xulosa qildi Rossiya Tashqi ishlar vazirligi rasmiysi.

Ammo hanuz Oʻzbekiston hukumati Mariya Zaxarovaning savoliga javob bermadi.