Diyego Maradonaning “Xudoning qo‘li” to‘pi arzonga – 3,35 million dollarga sotildi

Diyego Maradona 1986-yilgi Jahon chempionatida Angliyaga qarshi o‘yinda mashhur “Xudoning qo‘li” golini urgan futbol to‘pi auksionda 3,35 million dollarga (2,9 million yevro) sotildi.

Yakuniy narx savdo oldidan belgilangan 10 million dollarlik (8,6 million yevro) bahodan ancha past bo‘ldi.

Futbol tarixidagi eng bahsli gol

2020-yilda vafot etgan Maradona bu bahsli golni Argentinaning Jahon chempionati chorak finalida Angliyaga qarshi o‘tkazilgan o‘yinida, Mexiko shahridagi “Asteka” stadionida urgan.

Bu zarba dastlab bosh bilan urilgan golga o‘xshab ko‘ringan. Biroq sekinlashtirilgan videolarda Maradona qo‘li bilan to‘pni Angliya darvozaboni Piter Shilton ustidan oshirib yuborgani aks etgan.

O‘sha paytda tunislik hakam Ali Bin Nosir qo‘l bilan o‘ynalganini payqamadi va golni hisobga oldi.

“Turnirdan oldin FIFA tomonidan berilgan ko‘rsatmalarga muvofiq, golning haqiqiyligini tasdiqlash uchun qanot hakamimga qaradim. U golning to‘g‘ri kiritilganiga ishonch hosil qilib, maydon markaziga qaytdi”, – degan Nosir.

Maradona bu golni “bir oz Maradonaning boshi bilan, bir oz Xudoning qo‘li bilan” urilgan deb ta’riflagan. Keyinchalik u to‘pni qo‘li bilan ataylab o‘ynaganini tan olgan va bu golni 1982-yilgi Folklend urushida vatani mag‘lubiyatga uchragani uchun Buyuk Britaniyadan olingan “ramziy qasos” deb atagan.

“Asr goli”

“Xudoning qo‘li” golidan atigi to‘rt daqiqa o‘tib, Maradona yana bir gol urgan.

To‘pni o‘z maydonining yarmida qabul qilib olgan Maradona deyarli butun Angliya jamoasi futbolchilarini aldab o‘tib, uni darvozaga yo‘lladi. Keyinchalik bu gol FIFA tomonidan “Asr goli” deb topildi.

Argentina o‘yinda 2:1 hisobida g‘alaba qozondi.

Rekord yangilanmadi

Adidas Azteca to‘pi ilk bor 2022-yilda auksionga qo‘yilgan. O‘shanda takliflar 2,37 million dollarga (2 million yevro) yetgan, biroq belgilangan minimal narxga erishilmagan.

Keyinchalik 2023-yilda yana auksionga qo‘yildi, ammo o‘shanda ham sotilmadi.

So‘nggi savdoda to‘langan narx esa eng qimmat sotilgan sport to‘pi rekordini ham yangilay olmadi.

Bu rekord hozirda “Los-Anjeles Dodgers” superyulduzi Shohei Ohtanining 50-xoum-ran to‘piga tegishli bo‘lib, u 2025-yilda 4,39 million dollarga (3,8 million yevro) sotilgan.