Argentina terma jamoasini kelajakda kim boshqarishi noaniq

Jahon chempionati finalida 10 kishi bo‘lib qolgan Argentina Ispaniyaga 0:1 hisobida mag‘lub bo‘ldi.

Argentina terma jamoasi  bosh murabbiyi Lionel Skaloni o‘yindan so‘ng bergan intervyusida kelajakdagi murabbiylik faoliyati borasida hali bir qarorga kelmaganini aytdi.

48 yoshli mutaxassis 2018-yilgi Jahon chempionatida Argentina 1/8 finalda musobaqani tark etganidan so‘ng bosh murabbiy etib tayinlangandi. O‘sha paytda uning mustaqil murabbiy sifatidagi tajribasi deyarli yo‘qligi sabab bu qarordan ko‘pchilik norozi bo‘lgandi.

Dekabr oyida Skalonining shartnomasi yakunlanadi. Agar u uzaytirilmasa, Skalo Argentina terma jamoasi tarixida eng muvaffaqiyatli murabbiy sifatida muhrlanadi.

Uning murabbiyligida Argentina:

• 2022-yilgi Jahon chempionati g‘olibi bo‘ldi;
• 2021 va 2024-yillarda Amerika kubogini qo‘lga kiritdi;
• 2026 yilgi mundialda jamoa finalga chiqdi.

“Shartnomam yakunigacha ishlayman, keyin biroz o‘ylab olishim kerak. Chunki bundan ham kattaroq natijaga erishish mumkinmi yoki yo‘qmi, bilmayman”, — dedi Skaloni.

Agar Skaloni faoliyatini davom ettirsa, endi ancha o‘zgargan tarkib bilan ishlashiga to‘g‘ri keladi.

39 yoshli Lionel Messi turnir davomida 8 ta gol va 4 ta golli uzatma bilan yana bir bor yuqori mahoratini namoyish etdi. Biroq sakkiz karra “Oltin to‘p” sohibining 2030-yilgi Jahon chempionatida ishtirok etishi amrimahol.

2022 va 2026-yilgi Jahon chempionati finallarida Argentinaning asosiy tarkibida sakkiz nafar futbolchi maydonga tushdi. Yaqin yillarda esa jamoada sezilarli avlod almashinuvi bo‘lishi muqarrar.

Skaloni final natijasiga e’tirozi yo‘qligini ham ta’kidladi. Uchrashuv davomida Ispaniya to‘p nazorati va zarbalar soni bo‘yicha ustunlik qildi hamda Ferran Torresning qo‘shimcha bo‘limning 106-daqiqasidagi goli evaziga 1:0 hisobida g‘alaba qozondi.

“Bizni qo‘llab-quvvatlagan barcha muxlislarga minnatdorchilik bildiraman. Ular bizga eng kerakli narsani – kuch-g‘ayratni berishdi. Oxirigacha kurashdik, ammo bu safar nasib qilmadi. Tan olishimiz kerak, Ispaniya g‘alabaga loyiq edi. Ammo, biz ham juda yaqin turgandik. Futbolchilarim va Jahon chempionati finaliga chiqishimiz uchun mehnat qilgan barchaga rahmat!” – dedi murabbiy.