Shaxmat Olimpiadasida oʻzbekistonlik sportchilar yana bir gʻalabaga erishdi

Unda Oʻzbekiston yigitlar terma jamoasi Misr terma jamoasiga, Oʻzbekiston qizlar terma jamoasi esa Angola qizlar terma jamoasiga qarshi dona surdi. Yakuniy natijalarga koʻra, yigitlar Misr terma jamoasini 3,5:0,5 hisobida, qizlar esa Angola terma jamoasini 3:1 hisobida magʻlub etib, ishonchli gʻalabaga erishdi. 

Oʻzbekiston yigitlar terma jamoasidan Nodirbek Abdusattorov raqibi Adham Fayziyni, Nodirbek Yakubov raqibi Kareym Vageyxni, Shamsiddin Vohodov raqibi Sadik Sameni 1:0 natija bilan magʻlub etgan boʻlsa, Javohir Sindarov raqibi Vafo Hamid bilan 0,5:0,5 natija orqali durang oʻyinni qayd etdi. 

Qizlar terma jamoasidan esa Afruza Hamdamova raqibi Paula Jemmani, Umida Omonova raqibi Junior Ednasiani, Marjona Malikova raqibi Pires Luziani 1:0 natija bilan yengdi. Ammo oʻzbekistonlik shaxmatchi Nilufar Yakubbayeva Angolaklik sportchi Caxita Esperainicaga imkoniyatni boy berdi. 

Eslatib oʻtamiz, bundan oldingi oʻyinda Oʻzbekiston yigitlar terma jamoasi Trinidad va Tobago Respublikasining yigitlar terma jamoasini 3,5:0,5 hisobida, qizlar terma jamoasi esa Gaiti Respublikasining terma jamoasini 4:0 hisobida yengan edi.