Surxondaryoda 81 marta qoida buzgan “uchar” haydovchi ushlandi

Majburiy ijro byurosi Surxondaryo viloyati boshqarmasi ish yurituviga Qiziriq tumanida yashovchi Olim Toʻrayev “Cobalt” rusumli avtomashinasida yoʻl harakati qoidalarini buzib, 81 marta maʼmuriy jarimaga tortilgani haqidagi ijro hujjati kelib tushdi. 

Bu holatlar orasida tezlikni oshirish, svetoforning taqiqlangan qizil chiroqlarida harakatlanish va boshqa qaltis qoidabuzarliklar borligi qayd etilgan.

Majburiy ijro byurosi va yoʻl harakati xavfsizligi xodimlari ishtirokida olib borilgan reyd chogʻida qoidabuzar haydovchining avtomashinasi ushlanib, vaqtincha saqlash uchun jarima maydonchasiga joylashtirildi. 

Avtomashina xatlovga olinib, qarzdorlik belgilangan muddatda bartaraf etilmasa, auksion savdolariga chiqarilishi haqida ogohlantirildi. Qoidabuzar haydovchi qarasaki, masala jiddiy. Avtomashinasidan ajralib qolishi ham hech gap emas. U amaldagi yoʻl harakati qoidalariga zid qilmishini toʻgʻri angladi, oʻttiz million soʻmga yaqin jarima toʻladi. 

MIB viloyat boshqarmasidan olingan maʼlumotlarga koʻra, vohada yoʻl harakati xavfsizligi xodimlari bilan hamkorlikda olib borilayotgan reydlar chogʻida qarzdorlik tufayli qidiruv eʼlon qilingan 756 ta avtomashina topilib, jarima maydonchasiga joylashtirildi.