Surxondaryoda shifokor va bemorni kaltaklagan “Alfa” jinoiy guruhi aʼzolari qoʻlga olindi

Maʼlum qilinishicha, Davlat xavfsizlik xizmati hamda Ichki ishlar boshqarmasi xodimlari tomonidan Surxondaryo viloyatining Denov tumanida yashovchi olti nafar shaxsdan iborat jinoiy guruhning noqonuniy faoliyati toʻxtatilgan.

IIV maʼlumotlariga koʻra, ushlanganlar oʻzlarini “Alfa” deb atab, Telegram ijtimoiy tarmogʻida shu nomda guruh tashkil etgan. Guruh aʼzolari turli sport turlari bilan shugʻullanib, koʻcha janjallarida ishtirok etib kelgan.

Jinoiy guruh rahbari 28 yoshli Xolmurodov Sunnatullox Muzaffarovich ekani aniqlangan. Guruh aʼzolari quyidagilar:

• Karimov Elbek Murodulla oʻgʻli, 1998 yilda tugʻilgan
• Ibodov Asliddin Karim oʻgʻli, 1998 y.t.
• Davlatov Azamat Alisher oʻgʻli, 1998 y.t.
• Joʻrayev Javohir Buron oʻgʻli, 1998 y.t.
• Jumayev Bahriddin Normatovich, 1989 y.t.

Tergov maʼlumotlariga koʻra, 6 yanvar kuni soat taxminan 20:50 da mazkur shaxslar Denov tumani tez tibbiy yordam boʻlimiga Skoda va Kia avtomobillari ishtirokida sodir boʻlgan YTHdan soʻng yetib kelgan. Ularning maqsadi Skoda haydovchisi boʻlgan tanishini koʻrish hamda Kia avtomobili haydovchisiga nisbatan jismoniy bosim oʻtkazish boʻlgan.

Shifoxonada ular asossiz ravishda janjal chiqarib, maʼmuriyatning tartibga rioya qilish haqidagi talablariga boʻysunmagan. Natijada shifokor va jabrlangan fuqaroga tan jarohatlari yetkazilgan.

Mazkur holat yuzasidan Oʻzbekiston Respublikasi Jinoyat kodeksining 277-moddasi 3-qismi “g” bandi (hokimiyat yoki jamoatchilik vakiliga qarshilik koʻrsatish bilan bogʻliq bezorilik) bilan jinoyat ishi qoʻzgʻatilgan. Gumonlanuvchilar qoʻlga olingan va ularga nisbatan qamoqqa olish tarzidagi ehtiyot chorasi qoʻllanilgan.

IIV fuqarolarni ushbu jinoiy guruh harakatlaridan jabr koʻrgan boʻlsa, ichki ishlar organlariga murojaat qilish yoki 102 qisqa raqamiga qoʻngʻiroq qilishga chaqirdi.