Surxondaryodagi suv omborida yirik zamonaviy ekoturizm majmuasi quriladi

Surxondaryo viloyatining Qumqoʻrgʻon tumanidagi “Janubiy Surxon suv ombori” hududida ekoturizm majmuasini bunyod etish uchun 15,7 gektar maydon ajratilgan. 

Loyiha qiymati 140 milliard soʻmlik turistik majmuani qurish va foydalanishda tabiiy muhitni avaylab asrash, yangi yashil maydonlar, ekologik talablarga mos yoʻl va infratuzilma tashkil etish, oqova suvlarni tozalash tizimini joriy qilish koʻzda tutilgan.

Yirik suv ombori hududida qad rostlaydigan zamonaviy ekoturizm maskanida kottej uylar, basseyn, avtoturargoh va avtomobillarni yuvish shoxobchalari, savdo, umumiy ovqatlanish va boshqa maishiy xizmat koʻrsatish nuqtalari, suv usti ayvonlari qad rostlaydi. Sport va bolalar maydonchalari, piyodalar yoʻlaklari quriladi. Baliqchilik yoʻlga qoʻyiladi. Atrofi yashil boyliklar bilan koʻkalamzorlashtiriladi. Mahalliy va xorijlik sayyohlar uchun barcha qulaylik yaratiladi.

Viloyat hokimi Ulugʻbek Qosimov suv omborida boʻlib, takomillashtirilgan loyiha taqdimoti bilan tanishdi. Kompleks uchun ajratilgan maydonlarni koʻzdan kechirib, qurilish-obodonlashtirish ishlarini boshlab, tizimli, bosqichma-bosqich amalga oshirish yuzasidan tegishli topshiriqlarni berdi.

Maʼlumotlarga koʻra, bundan 58 yil avval ishga tushirilgan “Janubiy Surxon” suv ombori dengiz sathidan 408 metr balandlikda joylashgan. Suv sathi yuzasi 65 kvadrat-kilometrni, toʻla suv sigʻimi 800 million kub-metrni tashkil etadi.