Oksford bilan hamkorlik: Yangi Oʻzbekiston universiteti xalqaro maydonga chiqmoqda

Rasmiy bayonotda taʼkidlanishicha, bunday nufuzli universitet bilan hamkorlik Yangi Oʻzbekiston universitetining xalqaro akademik maydondagi mavqeini yangi bosqichga olib chiqadi.

Oksford universiteti soʻnggi yillarda Times Higher Educationning World University Rankings reytingida ketma-ket jahonning birinchi raqamli universiteti sifatida eʼtirof etilmoqda. Shuningdek, QS World University Rankings reytinglarida ham doimiy ravishda eng yuqori pogʻonalarda qayd etiladi.

Oxford Hub platformasi Oʻzbekiston oliy taʼlim muassasalariga Oksford universitetining yetakchi olimlari va mutaxassislarining ilgʻor tadqiqotlariga tizimli va rasmiy asosda kirish imkoniyatini yaratadi.

Tashabbus Oksford universiteti tarkibidagi Wolfson College huzurida faoliyat yurituvchi Oxford Birsöz Initiative tomonidan muvofiqlashtiriladi va Buyuk Britaniya hukumati koʻmagida amalga oshiriladi.

Taʼkidlanishicha, mazkur hamkorlik sunʼiy intellekt, muhandislik, ilgʻor texnologiyalar va ilm-fanning boshqa yoʻnalishlarida Oʻzbekiston va Britaniya olimlari oʻrtasida keng koʻlamli hamkorlik hamda yangi ilmiy tadqiqotlarga zamin yaratadi.

Maktabgacha va maktab taʼlimi vaziri Eʼzoza Karimova platforma ishga tushirilishi akademik hamkorlik, professor-oʻqituvchilar almashinuvi va qoʻshma ilmiy tadqiqotlarda muhim ahamiyat kasb etishini qayd etdi.

Tadbirda Buyuk Britaniyaning Markaziy Osiyo va Ozarbayjon boʻyicha savdo vakili Jon Olderdaysga Yangi Oʻzbekiston universitetining «Faxriy professori» unvoni topshirildi.

Lord Jon Olderdays Oʻzbekistonda taʼlim sohasida amalga oshirilayotgan islohotlar mamlakat taraqqiyotiga xizmat qilishini taʼkidladi.