Toshkentni changga toʻldirayotgan quruvchilar aniqlandi

Videoda koʻrish mumkinki, qurilish hududida kirib-chiqayotgan yuk mashinalari gʻildiraklari changdan tozalanmasdan, qum va tuproq ortilgan yuk usti yopilmasdan tartibsiz harakatlangani oqibatida unga yondosh boʻlgan yoʻllarda tuproq-qum toʻkilgan. Shu sababli mazkur yoʻldan harakatlanayotgan mashinalar atrofni changga toʻldirib, havoni ifloslantirmoqda. 

Eng ajablanarlisi shundaki, bu ish Shayxontohur tuman hokimligining qarshisida sodir boʻlmoqda va bu holatga hokimlik tomonidan befarqlik bildirilmoqda. Qurilish va uy-joy kommunal xoʻjaligi vazirligi ham bu hududdan uzoqda joylashmagan. 

Maʼlumot uchun, bugun, 12 oktabr soat 21:45 holatiga koʻra, Toshkent shahridagi havoning ifloslanish boʻyicha koʻrsatkichi "oʻrtacha" darajani qayd etgan. Bunday holatlarda oʻpka-nafas olish yoʻllarida kasalligi bor bemorlarning koʻchalarda niqobsiz yurmasligi hamda chang havoning uyga kirmasligi uchun derazalarni yopish tavsiya etiladi.