Toshkent yoʻllarida tirbandliklarni kamaytirish boʻyicha senator soʻrovi yuborildi

Ayniqsa, oʻquv yili boshlanishi bilan Toshkent shahrida harakat keskin kuchayib, ayrim vaqtlarda tirbandlik darajasi eng yuqori — 10 ballgacha boʻlayotgani, bu esa ishga, oʻqishga hamda turli maqsadlarda poytaxtga yoʻl olgan minglab fuqarolarning vaqti zoye ketishiga olib kelayotgani taʼkidlandi.

Maʼlumotlarga koʻra, har kuni 1 millionga yaqin kishi poytaxtga tashrif buyuradi, ularning 275 ming nafari Toshkent viloyatidan kelmoqda. Viloyatning tutash hududlaridan minglab avtomobillarning ertalab poytaxtga kirib, kechqurun ortga qaytishi esa tirbandliklarni yanada kuchaytirmoqda.

Senator soʻrovida vazirlikdan Toshkent shahrida tirbandliklarni kamaytirish boʻyicha amalga oshirilayotgan choralar, “Intellektual transport” tizimining amaldagi holati, jamoat transportini yagona aglomeratsiya tizimiga oʻtkazish jarayoni, shuningdek, prezident tomonidan belgilangan vazifalar ijro etilishi va ularning kechikishi sabablari yuzasidan atroflicha maʼlumot taqdim etish soʻralgan.