Istanbuldan Toshkentga uchayotgan samolyot yuzaga kelgan nosozlik tufayli ortga qaytarildi

Maʼlum qilinishicha, HY272 reysini bajarayotgan samolyot havoga koʻtarilgan. Oradan 1 soat oʻtib, havo kemasining signalizatsiya tizimi ishga tushgan. Tizim salon va kabinadagi bosimning beqarorligi haqida signal bergan.

“Parvoz xavfsizligini taʼminlash maqsadida havo kemasi komandiri samolyotni joʻnash aeroportiga qaytarish toʻgʻrisida qaror qabul qildi. Mahalliy vaqt bilan 15:50 da samolyot Istanbul aeroportiga muvaffaqiyatli qoʻndi. Aviakompaniyaning texnik xizmatlari havo kemasini Toshkentdagi bazaga qaytarish boʻyicha zarur choralarni koʻrmoqda. Ushbu reys yoʻlovchilari zaxira havo kemasi orqali Toshkentga yetkaziladi va kutish davrida mehmonxonaga joylashtiriladi”, — deyiladi xabarida.

Aviakompaniya axborotiga koʻra, yoʻlovchilar Istanbuldan 29 iyul kuni mahalliy vaqt bilan soat 07:30 da uchib, Toshkentga soat 13:35 da yetib keladi.