Transportdan bepul foydalanuvchilar safi kengaymoqda

Jumladan, bugungi kunda 9 toifadagi shaxslar shahar yoʻlovchi transportidan bepul foydalanish huquqiga ega. 

Soʻnggi 2 yilda davlat rahbarining tashabbusi bilan oʻzgalar parvarishiga muhtoj boʻlgan yolgʻiz keksalar, yolgʻiz yashovchi keksalar va nogironligi boʻlgan shaxslarga, shuningdek, “Oʻzbekiston Respublikasi faxriy donori” koʻkrak nishoni bilan taqdirlangan fuqarolarga shahar yoʻlovchi transportidan bepul foydalanish imkoniyati berildi. 

Endilikda bu toifadagi shaxslar safi kengaymoqda. Yangi ishlab chiqilgan ijtimoiy himoyaga muhtoj aholini qoʻllab-quvvatlashga qaratilgan qonun loyihasiga koʻra, I guruh nogironligi boʻlgan va ularga hamrohlik qiluvchi bir nafar shaxsga hamda Ikkinchi jahon urushi nogironlariga tenglashtirilgan shaxslarga shahar yoʻlovchi transportidan bepul foydalanish imkoniyati yaratilmoqda.

Shuningdek, loyihada davlat organlari va ularning mansabdor shaxslari avtomobil transportida yoʻlovchi va yuk tashish faoliyati bilan shugʻullanuvchi jismoniy va yuridik shaxslarning xoʻjalik faoliyatiga aralashishi hamda ushbu tashkilotlarning ishlayotgan xodimlarini boshqa ishlarga jalb etishi faqat tabiiy va texnogen xususiyatga ega favqulodda vaziyatlar yuzaga kelgan, bunday holat joriy etilgan hollarda amalga oshirilishi belgilanmoqda.

Yaqinda parlament quyi palatasi tomonidan birinchi oʻqishda qabul qilingan mazkur qonun loyihasida koʻzda tutilayotgan normalar aholining ijtimoiy himoyaga muhtoj qatlamlarini qoʻllab-quvvatlash, davlat tomonidan fuqarolarga ijtimoiy xizmat koʻrsatish koʻlamini yanada kengaytirishga xizmat qiladi. Shu bilan birga, qonun hujjatlaridagi boʻshliqlar toʻldirilishiga asos boʻladi.