Tunda guldasta olib kelgan notanish erkak Rizayeva uyiga kirmoqchi boʻldi

12 noyabr kuni kechqurun mashhur xonanda Munisa Rizayevaning singlisi — Karima Rizayevaning uyiga qoʻlida guldasta koʻtarib kelgan nomaʼlum erkak militsiya tomonidan hibsga olindi. Karimaning aytishicha, erkak gullarni shaxsan topshirishga qatʼiyat bilan uringan, ammo u eshikni ochmagan va voqeani kuzatuv kamerasi orqali qayd etgan.

Rizayevaning taʼkidlashicha, uyda xavfsizlik tugmasi mavjud boʻlib, u bosilgandan soʻng ikki daqiqa ichida navbatchi militsiya guruhi yetib kelgan. Tezkor guruh nomaʼlum shaxsni hibsga olgan va keyinchalik uning avval giyohvand moddalar, bosqinchilik va oʻgʻrilik kabi jinoyatlar uchun javobgarlikka tortilgani aniqlangan.

Karima Rizayeva sodir boʻlgan holat yuzasidan shunday dedi:

“Bu eʼtibor belgisi emas, balki shaxsiy xavfsizlikka tahdid. Odamning uyiga ogohlantirmasdan, ayniqsa, tun vaqtda kelish mumkin emas.”