Fargʻonada noqonuniy saqlanayotgan yuzlab gaz ballonlari topildi

Aytilishicha, "Hududgaztaʼminot" AJ Komplayens nazorat tuzilmalari, "Hududgaz Fargʻona" gaz taʼminoti filiali xodimlari va huquqni muhofaza qiluvchi organlari bilan hamkorlikda nazorat tadbirlari oʻtkazilgan. 

Tadbir davomida Fargʻona viloyati Buvayda tumanining "Dehqonobod" va "Doʻstlik" MFYlarida suyultirilgan gaz ballonlarini noqonuniy saqlash uchun moʻljallangan bunkerlar borligi aniqlangan. 

Xususan, "Dehqonobod" MFYda fuqaro A.T.ga tegishli noturar joyda 69 ta, fuqaro E.F. xonadonida 35 ta "Hududgaz Fargʻona" gaz taʼminotiga tegishli maishiy gaz ballonlari topilgan.

Shuningdek, fuqaro A.K. ham mahalladagi noturar joyda bunker tashkil qilgan va u yerda 110 ta maishiy gaz balloni saqlanayotgani maʼlum boʻlgan. 

Bundan tashqari, "Doʻstlik" MFYda joylashgan fuqaro A.T. ga tegishli noturar joyda ham T.H. tomonidan bunker tashkil etilgan holda, 200 dona gaz balloni saqlangan.

"Tadbirlar davomida jami 414 dona (314 tasi suyultirilgan gaz bilan toʻldirilgan) maishiy gaz ballonlaridagi 6,2 ming kg suyultirilgan gaz mahsuloti talon-toroj qilinishining oldi olindi", deyiladi xabarda.

Holatlar yuzasidan tegishli tartibda dalolatnomalar tuzilgan va barcha hujjatlar huquq-tartibot organlariga taqdim etilgan.