Фарғонада ноқонуний сақланаётган юзлаб газ баллонлари топилди

Айтилишича, "Ҳудудгазтаъминот" АЖ Комплаенс назорат тузилмалари, "Ҳудудгаз Фарғона" газ таъминоти филиали ходимлари ва ҳуқуқни муҳофаза қилувчи органлари билан ҳамкорликда назорат тадбирлари ўтказилган. 

Тадбир давомида Фарғона вилояти Бувайда туманининг "Деҳқонобод" ва "Дўстлик" МФЙларида суюлтирилган газ баллонларини ноқонуний сақлаш учун мўлжалланган бункерлар борлиги аниқланган. 

Хусусан, "Деҳқонобод" МФЙда фуқаро А.Т.га тегишли нотурар жойда 69 та, фуқаро Э.Ф. хонадонида 35 та "Ҳудудгаз Фарғона" газ таъминотига тегишли маиший газ баллонлари топилган.

Шунингдек, фуқаро А.К. ҳам маҳалладаги нотурар жойда бункер ташкил қилган ва у ерда 110 та маиший газ баллони сақланаётгани маълум бўлган. 

Бундан ташқари, "Дўстлик" МФЙда жойлашган фуқаро А.Т. га тегишли нотурар жойда ҳам Т.Ҳ. томонидан бункер ташкил этилган ҳолда, 200 дона газ баллони сақланган.

"Тадбирлар давомида жами 414 дона (314 таси суюлтирилган газ билан тўлдирилган) маиший газ баллонларидаги 6,2 минг кг суюлтирилган газ маҳсулоти талон-торож қилинишининг олди олинди", дейилади хабарда.

Ҳолатлар юзасидан тегишли тартибда далолатномалар тузилган ва барча ҳужжатлар ҳуқуқ-тартибот органларига тақдим этилган.