Navoiyda fuqaro nega kaltaklandi? IIB bayonot berdi

Mazkur holat Navoiy viloyati IIB tomonidan oʻrganildi. Aniqlanishicha, voqea joriy yilning 22 avgust kuni tungi soat 2:00 larda Navoiy shahar "Ziyokor" mahallasi hududida sodir etilgan boʻlib, Karmana tumanida yashovchi 1994 yilda tugʻilgan S.A. mazkur mahalla hududida joylashgan restoranlarning biriga oʻziga yaqindan tanish boʻlgan fuqarolar bilan ovqatlanish uchun borgan. 

Yakunda fuqaro S.A. toʻlovni amalga oshirgan va yetmay qolgan maʼlum miqdordagi pul mablagʻini avtomashinadan olib berish uchun tashqariga chiqqan vaqtida, mazkur restoranda ishlovchi 2004 yilda tugʻilgan fuqaro M.U. uning oldiga borib, qolgan toʻlov pulini ham amalga oshirishini soʻragan. Spirtli ichimlik taʼsirida boʻlgan S.A. oʻzaro ogʻzaki tortishib qolib, jamiyatda yurish-turish qoidalarini qasdan mensimasdan, oʻziga oldindan tanish boʻlmagan fuqaro M.U. ni hech bir sabablarsiz qoʻli bilan yuz sohasiga urib, tan jarohati yetkazgan. 

Surishtiruvlar davomida gumonlanuvchi fuqaro S.A. olimpiada chempioni emasligi, oʻsha kuni restoranga 1995yilda tugʻilgan disk uloqtirish boʻyicha ikki karra paralimpiada chempioni, fuqaro E.S. bilan birgalikda uning avtomashinasida borganligi, oʻzaro tortishuv kelib chiqqan jarayonda fuqaro E.S. avtomashina salonida boʻlganligi va holatga keyinchalik aralashib, fuqaro S.A. ni tinchlantirishga harakat qilganligi hamda jabrlanuvchi fuqaroga tezkorlik bilan yordam koʻrsatganligi maʼlum boʻldi. 

Holat yuzasidan Oʻzbekiston Respublikasi Jinoyat Kodeksining 277-moddasi 1-qismi bilan jinoyat ishi qoʻzgʻatilgan. Hozirda tergov harakatlari olib borilmoqda.