Osiyo taraqqiyot banki: 2025-yilda moliyalashtirish hajmi 44 milliard dollarga yetdi

Osiyo taraqqiyot banki rahbari tarqoq milliy yechimlarga asoslangan avvalgi yondashuvlar endi zamonaviy inqirozlar ko‘lamiga mos kelmasligini ta’kidladi.

Qayd etilishicha, bank mintaqani qo‘llab-quvvatlashni kuchaytirmoqda. 2025-yilda moliyalashtirish hajmi rekord darajada 44 milliard AQSH dollariga yetdi, shundan 29 milliard dollardan ortig‘i o‘z mablag‘larini tashkil etdi. Hamkorlik mexanizmlari orqali qo‘shimcha 15 milliard dollarga yaqin mablag‘ jalb qilindi.

Qariyb 60 yil ichida bank ustaviga kiritilgan birinchi o‘zgartirish muhim qadam bo‘ldi. Bu esa qo‘shimcha kapital jalb qilmasdan moliyalashtirish hajmini 50 foizga oshirish imkonini berdi. Ayniqsa inqirozli vaziyatlarda loyihalarni amalga oshirishni soddalashtiruvchi va resurslarni taqsimlashni tezlashtiruvchi mexanizmlar joriy etilmoqda.

Uzoq muddatli tashabbuslarga alohida e’tibor qaratilmoqda. Transchegaraviy energetika infratuzilmasini rivojlantirishga qaratilgan 50 milliard dollarlik “Pan-Asia Power Grid” loyihasi shular jumlasidandir. 2035-yilga borib, 20 gigavatt qayta tiklanuvchi energiya manbalarini integratsiya qilish va 200 million aholini elektr energiyasi bilan ta’minlash kutilmoqda.

Shu bilan birga, byudjeti 20 milliard dollar bo‘lgan “Osiyo–Tinch okeani raqamli magistrali” dasturi amalga oshirilmoqda. Unda 650 million aholining internetga kirishini kengaytirish, aholi o‘rtasida raqamli ko‘nikmalarni rivojlantirish ko‘zda tutilgan.

Ta’kidlanishicha, iqtisodiy o‘sishni ta’minlashda ish o‘rinlarining 90 foizdan ortig‘ini tashkil etuvchi xususiy sektor asosiy rol o‘ynashi kerak. Shu bois, xususiy sektorni har yili moliyalashtirishni 2030-yilga borib 13 milliard dollarga yetkazish maqsad qilingan.

Ustuvor yo‘nalishlar qatorida ekologiya masalalari ham qayd etilgan. Bank iqlim o‘zgarishiga qarshi kurashish, biologik xilma-xillikni saqlash va tabiiy resurslardan oqilona foydalanishga qaratilgan loyihalarga sarmoyalarni ko‘paytirmoqda.

Bank prezidenti misol tariqasida suv resurslarini samarali boshqarish orqali qishloq xo‘jaligi ekinlari hosildorligi va fermerlar daromadini sezilarli darajada oshirishga erishgan Indoneziya tajribasini keltirdi.