Vengriyada tahsil olayotgan oʻzbekistonlik talabalar sonini oshiriladi

Safar davomida delegatsiya Budapeshtdagi Korvinus universiteti rektori Bruno van Pottelsberge va Vengriya qishloq xoʻjaligi va tabiiy fanlar universiteti (MATE) rektori Chaba Dyuricha bilan samarali uchrashuvlar oʻtkazildi. 

Asosiy eʼtibor ikki mamlakat oʻqituvchilari va talabalari oʻrtasidagi qoʻshma taʼlim dasturlari, ilmiy tadqiqotlar va tajriba almashinuvini rivojlantirishga qaratildi.

Korvinus universiteti rektori Bruno van Pottelsberge bilan qishloq xoʻjaligi va agrobiznes sohasida qoʻshma taʼlim dasturini yaratish istiqbollari muhokama qilindi. Hamkorlik doirasida Vengriya ekspertlari ishtirokida Toshkent davlat agrar universiteti talabalari uchun venger tili kurslarini tashkil etish, shuningdek, suv resurslarini boshqarish va veterinariya sohalarida qoʻshma loyihalarni amalga oshirish rejalashtirildi.

MATE bilan akademik hamkorlikni kengaytirishga alohida eʼtibor qaratildi. Oʻzbekistonlik oʻqituvchilar ushbu universitetda ilmiy stajirovka oʻtashlari, qoʻshma tadqiqotlarda ishtirok etishlari va natijalarni xalqaro ilmiy jurnallarda eʼlon qilishlari mumkin boʻladi. Bundan tashqari, TDAU professorlarini ushbu universitet tomonidan oʻtkaziladigan xalqaro konferensiyalarga lektor va maʼruzachi sifatida taklif qilish koʻzda tutilgan.

Muzokaralarning muhim qismi 2023 yilda yoʻlga qoʻyilgan qishloq xoʻjaligi va oziq-ovqat texnologiyalari boʻyicha qoʻshma taʼlim dasturini kengaytirish masalasi boʻldi. Vengriyada tahsil olayotgan oʻzbekistonlik talabalar sonini oshirish rejalashtirilmoqda.

Safar yakunlari TDAU va Vengriya universitetlari oʻrtasidagi strategik hamkorlikning yuqori darajasini tasdiqladi va yaqin kelajakda yangi qoʻshma taʼlim, ilmiy va tadqiqot loyihalarini amalga oshirish uchun mustahkam zamin yaratdi.