Sun’iy intellekt AQSH va Xitoyning asosiy raqobat maydoniga aylandi

Xitoy rahbari Si Szinpinning AQSHga rejalashtirilgan tashrifi arafasida Vashington va Pekin sun’iy intellekt masalasida yangi muzokaralarni olib bormoqda. 

Tomonlar SI xavfsizligi bo‘yicha alohida muloqotni kengroq iqtisodiy muzokaralar bilan integratsiyalash imkoniyatini ham ko‘rib chiqmoqda. May oyida ikki davlat rahbarlari SI bo‘yicha hukumatlararo muloqotni yo‘lga qo‘yishga kelishib olgandi.

South China Morning Post nashrining yozishicha, Pekin AQSH tomonidan o‘rtaga tashlangan SI xavfsizligi talablari sun’iy intellektning salbiy oqibatlarini kamaytirishi bilan birga Xitoyning SI texnologiyasini rivojlantirishiga ham to‘sqinlik qilishidan xavotirda. Shu sabab xavfsizlik masalasi texnologik raqobatga ham bog‘lanib qolmoqda.

Raqobat chiplar bilangina cheklanmagan

Avvallari AQSH va Xitoy o‘rtasidagi texnologik qarama-qarshilik asosan yarimo‘tkazgichlar va ularning eksporti atrofida kechardi. Endilikda sun’iy intellekt markaziy yo‘nalishlardan biriga aylanmoqda.

SI modellari, ularni o‘qitishda foydalaniladigan manbalar, xavfsizlik standartlari va ilg‘or texnologiyalardan foydalanish imkoniyati ikki davlat o‘rtasidagi muzokaralarning muhim mavzusiga aylanib ulgurdi.

AQSH ilg‘or SI texnologiyalarining xavfsizligi va ulardan harbiy yoki kiberhujumlarda foydalanmaslik kafolati yo‘qligidan xavotirda.

Vashington yaqinda Xitoyning ayrim SI kompaniyalarini AQSHda yaratilgan modellar xususiyatlarini noqonuniy ravishda ko‘chirishda ayblagan. Pekin esa bu ayblovlarni rad etib, AQSH Xitoyning texnologik rivojlanishini cheklashga urinayotganini bildirgan.

SI xavfsizligi – global masala

Pekin ham SI bilan bog‘liq xatarlar to‘g‘risida tez-tez xavotirli bayonotlar beradi. Xitoy rasmiylari sun’iy intellekt texnologiyasi uchun xalqaro xavfsizlik va boshqaruv mexanizmlarini tatbiq etishga chaqirgan.

AQSH prezidenti Donald Tramp esa SI rivojlanishini ortiqcha tartibga solish AQSHning Xitoy ustidan texnologik ustunligini zaiflashtiradi, degan pozitsiyada. Tramp AQSHning SI sohasidagi peshqadamligini saqlab qolishni ustuvor vazifa sifatida ilgari surmoqda.

Shu sababli Si Szinpin va Donald Tramp o‘rtasidagi rejalashtirilgan uchrashuvda SI masalasi oddiy texnologik mavzudan ko‘ra kengroq geosiyosiy ahamiyat ham kasb etishi shubhasiz.

Tomonlar bir vaqtning o‘zida SI xavfsizligi bo‘yicha hamkorlik qilish va texnologik ustunlik poygasini davom ettirish muammosiga duch kelmoqda.